KONFLITU ENTRE JOVENS IHA DILI: ESTUDU KAZU ENTRE PERÍODU 2023 NO 2024

KONFLITU ENTRE JOVENS IHA DILI: ESTUDU KAZU ENTRE PERÍODU 2023 NO 2024

 

Cesar Ferreira Amaral[*]

Sensus Populasaun 2022 relata, totál populasaun Timor-Leste (T-L) hamutuk, 1,341,737. Hosi hirak ne’e besik 70% konstitui hosi foin-sa’e sira, feto no mane.(INETL, 2022). Ida-ne’e, iha parte ida konsidera nu’udar rekursu potensiál no iha parte seluk nu’udar impedimentu ba dezenvolvimentu país, bainhira laiha investimentu sériu hosi estadu ba área dezenvolvimentu juventude.

Estadu T-L rekoñese foin-sa’e sira nu’udar sujeitu importante liuhosi hatuur iha lejizlasaun nasionál artigu-19 (Klosan sira) ne’ebé hateten; “1. Estadu foti no fó barani ba klosan no feto-raan sira, atu sira bele hako’ak metin unidade nasionál, bele harii fali, tuba no haburas nasaun ne’e. 2. Estadu sei halo buat hotu-hotu ne’ebé nia bele, atu tulun edukasaun, saúde, formasaun profisionál ba klosan sira”.(Konstituisaun, 2002). Provizaun ida-ne’e hatudu katak, estadu konsidera foin-sa’e sira nu’udar autór esensiál ne’ebé sei jere nasaun ne’e nia destinu iha futuru.

Kondisaun ideál hirak ne’e kontradóriu ho realidade atuál iha T-L. Dezenvolvimentu ne’ebé la balansu, halo foin-sa’e sira balun sei envolve iha konflitu ho nia razaun rasik. Tinan-tinan sempre akontese konflitu entre foin-sa’e sira. Sosiedade dalabarak prezume katak foin-sa’e hirak ne’ebé komete krimi sira, mai hosi organizasaun arte marsiál no rituál.

Hafoin tinan-22 ukun rasik-an, T-L sempre enfreta konflitu oioin. Realidade istórika haktuir, iha Abril-2006, Dili, sidade kapitál Timor-Leste, moris akontesimentu boot ida nu’udar violénsia koletiva, wainhira kontradisaun kona-ba tratamentu la hanesan iha forsas armadas laran nakfera no rezulta iha ema balun mate, uma besik 2,000 aat no ema besik na’in-150,000 sai dezlokadu. (Leste, 2008).

Konflitu kontinua akontese, bainhira hakat liu krize maun-alin iha 2006, entre lorosa’e no loromonu. Supozisaun katak, konflitu hirak ikus ne’e akontese tanba diferente arte marsiál no rituál mós iha kazu sivil balun, hanesan hada’u malu rai no hela-fatin. Polisia Nasionál Timor-Leste (PNTL) rejista kazu konflitu, iha juñu-2021 hamutuk  na’in-316. (Policia Nacional, 2021). Kazu hirak ne’e la klasifika ba tipu kazu saida, no mós la esplika sé mak komete kazu krimi hirak ne’e no tanba sá?

Entretantu, peskizadór Australianu, James Scambary et.al, iha sira-nia peskiza kona-ba Konflitu no Reziliénsia iha Perumdis, Comoro, konklui katak violénsia iha Dili ne'e kompleksu tebes, liu-liu tanba sentralizasaun no migrasaun ba foin-sa'e sira husi área rurál ba urbanu, ne'ebé rezulta ambiente urbanu íbridu (over urbanization) ida-ne'ebé mós lori konsekuénsia no hamosu konflitu barak. James mós ko'alia kona-ba fatór barak ne'ebé kauza konflitu sosiál hanesan ki’ak, populasaun barak liu, etnias ne’ebé kahur-malu no estrutura sosiál ne'ebé la estavel (diskripánsia sosiál).(Murray et al., 2010).

Iha estudu anteriór balun, liuliu estudu sosiál kontemperáneo, nu’udar ezemplu ida, estudu ida hosi Brazil, kona-ba violénsia urbanu (Paloma, 2024) hatudu katak violénsia ne'ebé aumenta tanba problema sosiál oioin hanesan: ki’ak, dezempregu, problema jenétiku no implementasaun lei ne'ebé fraku. Estudu ida-ne'e, ladún diferente dook hosi rezultadu peskiza ne'ebé publika husi Komisaun Anti-Korrupsaun (KAK) Timor-Leste iha tinan kotuk (2023), ne'ebé hateten  ki’ak no dezempregu nu’udar problema prinsipál iha Timor-Leste.

Kona-ba violénsia, Max Weber, iha ninia teoria “A Política como vocação ”(Weber, 1968) hateten, Estadu iha relasaun íntimu ho violénsia. Estadu iha podér (lejítimu, karismátiku, tradisionál) hodi kontrola violénsia. Se violénsia nafatin akontese, signifika estadu tama ona iha kondisaun frajil.  Iha sentidu ida-ne'e, estadu dala barak husik violénsia la ho pena/kastigu ruma no kriminaliza ho prosesu kleur. Aleinde ne’e, pena ne'ebé fó ba kriminozu ida nia todan la hanesan ho krime ne'ebé komete. La’ós de’it hirak ne’e, ita bele haree kazu barak seluk ne’ebé PNTL atua la respeita prezunsaun inosénsia, no dalabarak halo extra judicial killing (pembunuhan diluar hukum).(Amaral, 2022).

Sorin seluk, abut hosi violénsia iha país ida kauza hosi organizasaun sira-ne’ebé servisu hodi naran orden estadu nian, iha kotuk iha intentasaun seluk ne’ebé influénsia hosi grupu no organizasaun. Situasaun hirak ne’e, fó estímulu ba kriminozu sira atu hakarak no iha forsa liután hodi komete violénsia, provoka malu, no idaidak buka justisa ho dalan rasik.

Iha estudu ida-ne’e, autór buka komprende ho detallu kona-ba konflitu sira mak akontese iha Períodu ikus ne’e, liuliu iha tinan-2023 no 2024, iha Dili. Utiliza Conflict Analysis Tools  (ABC Triangle, Conflict Tree, Conflict Mapping, no Bombay) hodi analiza isu, autór, kauza, no sekuénsia sira ho akontesimentu.(Building, n.d.; Mason & Rychard, 2005).

Attitude, Behavior and Context (ABC triangle) tuir (Cyrenians, 2015) konsidera nu’udar ferramentu ida-ne’ebé dezenvolve hosi Jhon Galtung, ho objetivu halo analiza ba konflitu ruma relasiona ho saida mak ita bele haree (vizivel) hanesan hahalok sira (deklarasaun, ofensa, insultu, atake) no atitude (prejudices, perspetiva, sentimentu, fiar) no mós kontestu sira ne’ebé invizivel (polítika, kultura, ekonomia no antesedensia istórika).

Nu’udar ezemplu, akontesimentu ne’ebé akontese iha Beto Tasi, akontese atake malu, ofensa, ho hasai liafuan mál ba malu entre parte (diskonfia entre arte marsiá sira PSHT no KERA SAKTI). Iha fotografia no vídeo balun ne’ebe partilla hatudu, akontesimentu refere rezulta sunu motorizada ida, tuda-malu no na’in ida kanek iha ulun. Iha kontestu kulturál nian, ida-ne’e akontese tanba diferente kultura organizasaun. Tuir dalalia ho PNTL ida hateten akontesimentu ida-ne’ebé akontese iha Beto, ne’e “bainhira komunidade balun hosi Beto Tasi ba hakoi-mate, fila hosi hakoi-mate mak deskonfia grupu balun hosi KERA SAKTI halo asaltu, nune’e rezulta parte rua halo konflitu”. Daudaun ne’e PNTL balun destakadu ona iha fatin refere. 

Hosi analiza ai-hun konflitu, (Conflict Tree Analysis) deskobre katak, konflitu ne’ebé akontese la’ós simplesmente diferente arte marsiál ka rituál (kultura organizasaun), ka hatún malu, abuzu alkohol, frustrasaun tanba la eskola maibé iha kontestu seluk ne’ebé nu’udar kauza boot, liuliu kontestu ekonomia no polítika. Podér ekonómiku ne’ebé la balansu, ki’ak, dezempregu sistemátiku, inklui desizaun polítika sira ne’ebé la konsege to’o ba povu ki’ik sira iha foho ne’ebé afeta ba urbanizasaun boot iha Dili, nu’udar kauza esensiál. Ita bele konfere Buletin Fundasaun Mahein  nian kona-ba “Urbanizasaun no Seguransa: Dili sentru Konflitu”” ne’ebé hateten […] migrante lokál sira ne’e maioria kompostu husi juventude ne’ebé ikus mai hamosu konflitu sosiál hanesan hada’u malu hela fatin, rai, involve iha grupu geng, dezempregu sistemátika, no seluk tan…(Fundasaun Mahein, 2013). Urbanizasaun ka migrante internál mós fó risku ba sira atu monu ba violénsia urbana nian, krime no hetan moras seksuál. (SEJD, 2016).

La’ós de’it hirak ne’e, rezultadu survey balun hosi Alumni Parlamentu Foinsa’e Timor-Leste (APFTL) ho Sekretária Estadu Juventude no Desportu (SEJD) hatudu katak “joven sira konsidera arte marsiál hanesan organizasaun ida-ne’ebé sira bele envolve-an, kompara hanesan atividade desportu ida.”(APFTL & SEJD, 2021).

Fatór xave seluk ne’ebé kontinua influénsia maka’as ba norma no prátika sosiedade ohin loron nian maka populasaun Timor-Leste nia esperiénsia konflitu pasadu. Rezultadu ida hosi konflitu maka ema barak kontinua haree violénsia entre feen-laen, inan-aman ho oan, hanesan buat ne’ebé normál tiha de’it. Nune’e, “normalizasaun violénsia” ne’e fatór importante ida-ne’ebé influénsia ba joven sira-nia hahalok ohin loron.(Fundasaun Mahein, 2024).

Sekuénsia hosi akontesimentu hirak ne’e la mesak. Hanesan haktuir leten, kronolojia akontesimentu sira, ligadu konflitu, kleur ona. Dezde kedas, Timor-Leste nu’udar Timor-Portugés (1515-1975), Timor Timur (1975-1999), akontese nanis konflitu sira; entre kolonializadór no povu Timor, no Timoroan ho Timoroan. Sekuénsia akontesimentu iha sidade Dili mai hosi violénsia koletiva ne’ebé nakfera iha okaziaun balun durante dékada neen ikus ne’e nia laran: iha tinan 1942, 1975, 1980, 1999, 2002, 2006 no 2007.(Murray et al., 2010).

Akontesimentu hirak ikus, hanesan kazu Beto Tasi, difisil tebes halo identifikasaun ka halo mapeamentu ba konflitu (Conflict Mapping). Bele de’it halo supozisaun katak akontese entre arte marsiais sira (labele identifika, tanba iha hela prosesu investigasaun hosi PNTL). Maski nune’e supozisaun hirak ne’e bele la loos, tanba Governu Konstitusionál XIX, liuhosi Rezolusaun Governu n.º 45/2023, hosi loron 10 fulan-novembru, halo ona suspensaun ba ensinu, aprendizajen no prátika artes marciais no rituais iha territóriu nasionál tomak, durante fulan-6. Rezolusaun ne’e mosu tanba haree ba tensaun konflitu ne’ebé aas iha tinan hirak ikus.(Rezolusaun Governu, Nú 45/2023 10 de Novembro).

Entretantu, haree kona-ba sira-nia posizaun, interese no hakarak, ita bele prezume pozisaun parte rua nian, idaidak defende sira-nia organizasaun no mós ódiu no vingansa ba malu. Atu hateke kle’an presiza no interese parte idaidak nian, ida-ne’e presiza entrevista ka observasaun partisipatóriu ruma, ho aprosimasaun kualitativu no interdisiplináriu. (Dr. J.R. Raco, M.E., 2010). So, ho de’it analiza no observasaun jerál la natoon hetan no hatene ho fundamentu sira-nia interese no hakarak, inklui sira-nia posizasaun.

Maski nune’e, la signifika ita konsidera konflitu ne’ebé akontese fila-fila iha kapitál nasaun to’o de’it iha konflitu entre grupu arte marsiál no rituál sira. Tuir hakerek-na’in nia análize katak, konflitu ne’ebé akontese ne’e nu’udar de’it sintomas ida, hosi problema estruturál seluk ne’ebé akontese iha T-L durante dekada rua liu, hafoin independénsia. Ida-ne’e presiza tebes investimentu no intervensaun sériu hosi estadu (governu) ba poblema estururál sira; ki’ak, dezempregu, urbanizasaun ne’ebé aas, edukasaun, ekonomia ne’ebé sentralizadu, dezenvolvimentu polítika ne’ebé la balansu (diskriminatóriu) no seluk tan. Nu’udar ezemplu ida hosi dezempregu, ita bele observa, normalmente otas foin-sa’e sira, hakarak barak, liuliu gasta osan-barak hodi hakonu sira-nia nesesidade, tuir ritmu no estilu sékulu atuál, maibé problema dezempregu halo sira laiha rendimentu natoon no afeta ba sira la atinji sá mak sira hakarak, nune’e eskala frustrasaun joven sira aumenta sei sai efeitu ba konflitu no problema sosiál sira seluk.

Hosi ideia hirak iha leten, konklui katak, konflitu entre foin-sa’e sira iha leten la’ós tanba diferensa arte marsiál ka rituál, maibé kauza hosi problema boot no estrurál seluk. Estadu iha papel krusiál atu hala’o nia misaun lulik ne’ebé konsagra iha Konstituisaun RDTL artigu 06^o jucnto artigu 19^o. Hadi’ak mekanizmu atendimentu sira hotu ba foin-sa’e sira, rezolve konflitu ho dalan pasífiku, justu no respeita direitos humanos. Rekomenda mós ba parte hotu, atu halo estudu kle’an ba konflitu sira iha Timor-Leste, nune’e bele tulun nu’udar referénsia ba desizaun sira iha tinan hirak mai.

 

---

[*] Docente Universidade Nacional Timor Lorosa’e.

22 ANOS “INDEPENDÉNSIA”: QUO VADIS TIMOR-LESTE?

 

22 ANOS “INDEPENDÉNSIA”: QUO VADIS TIMOR-LESTE?

R Ferreira

Dekada rua liu ona Timor-Leste (T-L) restaura nia ukun rasik-an, hodi sai estadu soberanu hanesan estadu sira seluk iha mundu raik-laran. Istórikamente, nasaun ki’ik ne’e kolonializa hosi Portugál durante tinan-450 no hosi indonézia durante tinan-24 nia laran. Iha tinan-2002, polítikamente konsege restaura hikas independénsia ne’ebé proklama iha 1975 hosi Komité Sentrál FRETILIN, lideradu Prezidente Francisco Xavier do Amaral ho afirmasaun abaixu kolonializmu no imperializmu. (lee; Testu Proklamasaun; K-RDTL).

Iha tinan ne’e (2024), ita selebra tinan-22 restaurasaun independénsia. Pergunta mak ne’e; ita selebra atinjimentu ka susesu saida iha tinan-22 hamriik nu’udar estadu “soberanu” ? Ita soberanu duni tuir saida mak founding parents sira proklama iha testu proklamasaun; abaixu imperializmu no abaixu kolonializmu?, Ka hanesan Samora dehan “troka de’it Bandeira, Inu nasionál no ema rai-seluk husik hela ita-nia rain, maibé espíritu kolonializmu no imperializmu nafatin horik ho ita”, liuhosi desizaun públiku sira? Ita soberanu duni tuir Soekarno dehan, “independénsia totál iha nível polítika, ekonomia no kultura”? Pergunta hirak ne’e, ita presiza diskuti iha selebrasaun aniversáriu Timor-Leste nian iha tinan ne’e.  

Importante liu atu ita hanoin ho krítiku pergunta hirak mensionadu. De jure ita restaura ukun rasik-an hosi kolonializmu ho imperializmu (Portugal no Indonézia husik hela ita-nia rain, ita troka ona Bandeira no Inu Nasionál). Mas, de facto, espíritu kolonializmu no Imperializmu moris nafatin, liuhosi desizaun públiku sira; n.e. duni povu hosi nia hela-fatin hodi fó ba osan-na’in sira (eviksaun), halo Komisaun Anti-Korupsaun hakne’ak liután, kronizmu fatin-fatin, prodús lejizlasaun sira ba de’it interese elite, lejizlasaun barak prodús iha nakukun laran laiha partisipasaun públiku, ameasa liberdade espresaun nst. Ita seidauk hamriik rasik iha ekonomia (dependénsia ba importasaun) no kulturalmente, ita-nia kultura kahur-malu entre osidentál no orientál; iha hanoin, hatais no komportamentu loroloron.

Tinan-22 “Independénsia”: T-L iha ne’ebé no sei bá ne’ebé?

Hafoin restaura ukun rasik-an, iha 2002 ho tulun servisu tranzitóriu UNTAET nian ita instala ita-nia sistema ekonomia, polítika, administrasaun públika no sistema sira seluk. Ho rekursu ne’ebé natoon, ita dezenvolve neneik ita-nia sistema polítika no ekonomia, inklui dezenvolve rekursu sira. Hafoin tinan-3, ita goja ukun rasik-an, ita enfrenta krize maun-alin ka krize identidade ne’ebé provoka instabilidade polítika interna. Hafoin ita konsege hakat liu todan ida-ne’e; “adeus konflitu, benvindu dezenvolvimentu”.

Iha krizi nia laran, Parlamentu Nasionál ho laran-malirin aprova lei ida-ne’ebé favorese ba sira-nia interese; “lei pensaun mensál vitalísia”. Lei ida-ne’ebé aprova iha povu nia todan, terus no mate nia leten. Lei ida-ne’e sei benefisia eis titulár sira to’o ohin loron.

Nu’udar ita hatene, durante tinan-22 Timor-Leste iha de’it reseita únika mak fundu mina-rai. Tinan-tinan governu foti fundos hosi fundu mina-rai hosi bilaun-ida to’o tolu hodi finansia Orsamentu Jerál Estadu (OJE). Ohin loron, fundu mina-rai besik hotu, ita hela de’it bilaun-18 liu depozita iha Banku Mundiál. (lee; Relatóriu Ministériu Finansas). Ho osan mak iha, ita dehan uza ba dezenvolve setór importante sira; edukasaun, saúde, agrikultura, turizmu, ekonomia, infra-estrutura (estrada, portu, aeroportu, transporte no telekomunikasaun,) bee no saneamentu, no seluk tan. Maski nune’e, orsamentu ne’ebé aloka ba área priopriodade sira la konsege solusiona problema sira mak povu enfrenta, simples liu la konsege redús liña ki’ak (42%) (lee; Relatóriu World Bank).  Ita lahatene osan hirak ne’e ba hotu ne’ebé? Ita-nia fundu úniku. Ita laiha polítika no ekonomia ida sustentavel hodi dezenvolve ho seriedade ba setór produtiva no estratéjiku sira, maka tinan-hirak mai tan ita sei monu ba rai-naruk. (lee; Why Nations Fail; Acemoglu no Robinson).

Kada tinan, OJE kuaze pursentu (80%) suli ba rai-liur liuhosi importasaun; hahú hosi nesesidade primária to’o tersiária ita importa. Ita-nia dezenvolvimentu agrikultura, ita seidauk to’o iha nivel seguransa alimentár sa tan ko’alia soberania alimentár. Ita to’o de’it iha agrikultura subsisténsia, prodús simplesmente ba atende han no hemu. Produsaun rai-laran mínimu liu, setór estratéjiku sira kuaze la hetan atensaun másimu. Ezemplu ida setór turizmu, ida-ne’ebé tinan-tinan ita to’o de’it iha karavana, halai hale’u sidade Dili. Uma Adat Tasi-Tolu, Kristu Rei, iha kedas Sentru Dili nian, hetan de’it vizita hosi Karau, Bibi no animál sira seluk.

Ita-nia maluk sira-ne’ebé hahú sira-nia atividade iha setór agríkola, hortikultura, akikultura, pekuária no setór produtiva seluk mate-moris tanba la hetan suporta másimu hosi estadu. Governu orgullu de’it ho investidór estranjeiru sira no haruka joven sira ba servisu iha rai-liur (nu’udar polítika redúz dezempregu iha rai-laran). Ita negosia joven sira-nia forsa produtiva ba osan-na’in sira, ne’ebé afeta ba migrasaun laborál boot kada tinan. Hirak ne’e la’ós joven sira-nia kulpa, ida-ne’e konsekuénsia hosi taxa dezempregu aumenta no oportunidade ba empregu iha rai-laran menus liu. (lee; Summary Timor-Leste labour Forces Survey).  Prezume katak, dalaruma ita-nia estadu orgullu ho empregu iha ema-nia rain, duké ita-nia rain rasik. To’o bainhira T-L dependénsia ba empregu hosi estranjeiru sira?  Problema hirak ne’e hotu la mesak, maibé ne’e problema estruturál no multi-dimensionál.

Tinan-tinan ita selebra T-L nia aniversáriu iha problema estruturál no multi-dimensionál hirak ne’e nia leten. Ita nunka halo relfesaun krítiku ruma ba kondisaun reál ne’ebé povu ida-ne’e enfrenta. Ita to’o de’it iha konsertu kintu-kantu, nein hetan benefísiu ruma ba povu nia moris. Ita ignora totalidade povu nia terus. OJE aprovadu kada tinan sulin de’it ba grupu-ki’ik balun nia bolsu liuhosi lei pensaun mensál vitalísia, lei subsídiu no abonu, lei dolar-haat kada votu no direitu regalia sira seluk.  

Se tinan-tinan ita hanesan ne’e mak, ita presiza husu Quo vadis Timor-Leste?  Ó bá ne’ebé Timor-Leste?, bá ukun-an ida totál ka, bá rai-naruk?

Felíz Aniversáriu Timor-Leste. Parabéns ha’u-nia Timór.  

KONFLITU ENTRE ISRAEL NO PALESTINA: REVIZAUN BIBLIOGRÁFIKA

KONFLITU ENTRE ISRAEL NO PALESTINA: REVIZAUN BIBLIOGRÁFIKA

R Ferreira

Konflitu entre Israel no Palestina nu’udar konflitu ida-ne’ebé kleur liu iha istória globál. Dezde kedas Israel sai nu’udar nasaun soberanu iha 1948, hosi kedas ne’ebá, funu entre Israel no Nasaun Árabe sira akontese, inklui Palestina. Inisiativa ba harii dame hosi organizasaun oioin iha mundu inklui Organizasaun Nasoens Unidas (ONU) nian la’o kleur ona, maski nune’e, to’o oras ne’e sei nafatin akontese funu oioin. Hanesan haktuir iha Center for Prevention Action katak, relatóriu lokál relata, Israel to’o oras ne’e kontinua halo atake ba Gaja (Palestina) ne’ebé halo Palestinianu sira kuaze millaun rua ka pursentu 80 husik hela sira-nia hela-fatin, sai migrante. Iha relatóriu ne’e mós relata, dadaun ne’e besik 20.000 populasaun mak lakon sira-nia vida, kuaze infra-estrutura sira estragu hotu, liuliu ospitál sira.(Action, 2024).

Antesedénsia Istórika 

Konflitu entre Palestina no Israel, tuir istória, liu ona tinan-50 resin. Bainhira iha 1967 Israel atake Mesir, Jordania, no Syria no susesu hada’u fali Gaza (Mesir), Foho Golan Syria no Jerusalem (Jordania). To’o oras-ne’e esperansa ba dame sei dook tebes. Aumenta tan ho futuru Palestina nian ne’ebé to’o oras ne’e la hetan konkordánsia. Hanesan Ahmad Rizky M. Umar dehan, destinu Palestina, ne’e reprezenta anomalia, buat ruma ne’ebe diferente radikalmente ho trend istória mundiál kontemporánea nian. Estadu barak hetan no aproveita ona direitu ba determinasaun destinu rasik, iha tempu hanesan ema Árabe-Palestina hetan sira-nia an iha situasaun ne’ebé laiha forsa no enfrenta posesu kolonializasaun ida-ne’ebé maka’as tebes no sistemátiku ba sira-nia nasaun durante tinan-barak nia laran” .”(Sayegh, 2021).

Dalabarak liu, ema konsidera funu entre Israel no Palestina to’o de’it iha aspetu rejiliaun, nune’e konsidera nu’udar funu entre relijiaun. Maibé, bainhira ita haree istória médiu oriente ho olístiku, mak ita sei hatene katak istória luta Palestina nian, la’ós simplesmente luta relijiozu (maski sentimentu rejiozu ne’e iha), maibé luta polítiku no ideolójiku ne’ebé hakarak Palestina livre hosi kolonializmu Israel nian. Ho lian seluk, luta ba ukun rasik-an povu Palestina nian hosi dominasaun imperializmu.

Durante tempu naruk, Palestina nu’udar kampu batalla entre nasaun jigante sira iha mundu. Poténsia dahuluk mak Estados Unidos Amérika (EUA), hatama nia interese “hegemonia” liuhosi Israel, nasaun ida-ne’ebé hamosu hosi prátika imperalizmu hafoin funu mundiál daruak. Iha jeo polítika, rejiaun refere sira projeta hodi kontrola rejiaun sira-ne’ebé riku, ba interese judeu sira-nian. (Ahmad Rizky Mardhatillah Umar, 2021). Loos duni, hanesan saida mak César de Paepe dehan, iha rejime kapitalista nia okos, funu ita nunka bele sees. Iha sosiedade modernu, funu la’ós kauza hosi Liurai nia ambisaun ka tuir ema ida nia hakarak, maibé tanba modelu sosiál no ekonomia ne’ebé dominante. Atu hateten, istória harii Israel nu’udar istória opresaun hasoru povu Palestina. (Musto, 2022).

Direitu ba Auto Determinasaun

Kleur ona, povu Palestina mehi ba ukun rasik-an. Palestinianu sira, la’ós de’it lakon sira-nia kontrolu polítiku ba sira-nia rain, maibé mós ba sira-nia horik-fatin: hada’u sira-nia direitu umanu liuliu atu desidi destinu rasik, maibé mos direitu báziku atu hela iha sira-nia rain rasik.

Kompromisu hodi la fó-biban ba independénsia Palestina nian, nu’udar mehi Zionizmu nian ida-ne’ebé nunka hotu. Nu’udar haktuir, Zionizmu nia objetivu ida mak, harii Israel nu’udar rezultadu konspirasaun estadu internasionál ba direitu estadu árabe sira. (Carr, 2005). Ideia hirak-ne’e vinkula ho deklarasaun Balfour (1917) ne’ebé kesi EUA, Inglaterra no Fransa hodi apoiu nasaun ida-ne’ebé sei harii iha rai Palestina nian. Hili Palestina nu’udar tárjetu, la’ós tanba de’it osan, maibé tanba Palestina nu’udar espasu vitál ba forsa mundiál. Atu hateten, hosi Palestina, Zionizmu bele oprerasionaliza nia misaun sira iha mundu.

Funu ne’ebé akontese entre parte rua halo povu Palestina barak mak halo migrasaun. Migrasaun refere hetan apoiu umanitáriu hosi sosiedade oioin ba sira-nia nesesidade báziku, hanesan apoiu sira UN Relief and Work Agency, iha tinan hirak ba kotuk. Maski nune’e, apoiu hirak ne’e hapara ona hosi Prezidente EUA nian Donal Trump.(Action, 2024).

Tuir loos, Palestina iha Direitu Polítiku hodi desidi nia auto determinasaun ba ukun rasik-an, tuir saida mak haktuir iha Paktu Internasionál Direitu Sivil no Polítiku. Ne’eduni, nu’udar sidadaun ida hosi País deskolonizadu, ita iha papel atu apoiu independénsia Palestina nian liuhosi, sosializa luta Palestina nian atravez plataforma virtuál sira mak ita idaidak iha. Apoiu organizasaun umanitáriu, movimentu ekstra parlamentariu sira-ne’ebé durante ne’e luta ba interese umanidade, inklui hola parte iha manifestasaun pasífiku sira-ne’ebé durante ne’e la’o iha ita-nia rain. Hirak ne’e ita halo nu’udar konkretizasaun ba lejizlasaun nasionál Konstituisaun RDTL artigu-10⁰ ne’ebé hateten; “1. Repúblika Demokrátika Timór-Leste mós solidáriu ho povu hotu-hotu ne’ebé luta ba libertasaun nasionál. 2. Repúblika Demokrátika Timór-Leste fó azilu polítiku, tuir lei haruka, ba ema raiseluk sira-ne’ebé persigidu tanba sira-nia luta ba libertasaun nasionál no sosiál, defeza ba direitus umanus, demokrasia no dame.(Konstituisaun, 2002).