KRÍTIKA TENKE IHA ÉTIKA?: REAFIRMA POZISAUN NO KURIJI NAKSALAK ! (Hatán ba David Martins-1)

KRÍTIKA TENKE IHA ÉTIKA?: REAFIRMA POZISAUN NO KURIJI NAKSALAK !

(Hatán ba  David Martins-1)

Cesar Ferreira Amaral

 

Hafoin publika tiha hanoin balun kona-ba Krítika, Krítiku & Étika Públika, hetan reasaun maka’as hosi públiku. Balu pro no kontra ho argumentasaun, enkuantu ema lubuk ida mak trata de’it. Iha espasu ne’e, ha’u hatán de’it ba hirak ne’ebé mak halo ‘anti-teze’ uza argumentu. “Argumentum ad argumentum”. Dala uluk, apresia ba belun David Martins (DM) ne’ebé maske preokupa ho atividade lubuk ida, maibé fó tempu uito’an hodi lee opiniaun sira mak ha’u publika iha ha’u-nia blogspot pesoál no mós Jornál Nasionál DIÁRIO. Ha’u hanoin katak, iha vida akadémika “dadalia argumentativa” mak nune’e, ita presiza haburas ida-ne’e ba oin. Espera Jornál nasionál sira bele kria espasu ba dialétika iha nivel hakerek nian.

Hafoin lee tiha diskordánsia balun hosi DM (evita la temi profisaun sá de’it, atu egaliter liu), ha’u hanoin hetan kedas, la’ós ema hotu-hotu bele lee ho loloos no di’ak saida mak ema hakerek (lee: Analfabetizmu funsionál). Indikadór ba ida-ne’e mak, ita bele haree ninia diresaun interpretasaun ne’ebé halai la tuir dalan, aliás la koerénsia hodi halakon nia signifikadu. Konserteza, bainhira ita tesi-kotu fraze ruma sees hosi nia kontestu, maka fraze ne’e rasik automátikamente lakon nia sentidu.

Iha konteudu hosi diskordánsia ne’ebé DM hakerek, konsege esplika lubuk ida kona-ba definisaun etimolojia, terminolojia no konseituál ba konseitu étika, morál no konseitu sira seluk hosi filózofu oioin (ida-ne’e kapás ba lee-na’in sira mak seidauk aprende étika no morál, inklui filozofia).  DM mós haruka  atu lee lai livru sira relasiona ho étika no morál. Agradese ba fó hanoin (biar matéria ne’e ha’u hanorin iha kampus kuaze tinan-lima resin). Aseita katak, importante duni atu lee beibeik (tanba lee la’ós atu komprende de’it kona-ba étika no morál, maibé nu’udar instrumentu ba libertasaun; liberta hosi ignoránsia, esplorasaun, marjinalizasaun, opresaun, inklui kekeliruan sira nst). Keta haluha mós katak, étika ne’ebé Aristóteles ko’alia iha momentu ne’ebá, liga iha kontestu demokrasia moderna, hamosu paradoksu barak. Nia ko’alia kona-ba eudaimonia, justisa nst, iha sorin seluk, halo diskriminasaun ba feto no atan sira hodi asesu iha vida polítika). Atu hakerek ida-ne’e labele arbiru, ha’u la hakle’an ida-ne’e, tanba la’ós ida-ne’e mak ha’u nia foku iha hakerek liubá. 

Hafoin leitura, hahú hosi primeiru to’o remata, ha’u hetan de’it pontu diskordánsia ida de’it, mak la aseita fraze “krítika nein iha ligasaun uito’an ho étika” no mós hateten, krítika konstrutivu no fó solusaun. Iha hakerek ne’e mós DM halo prezume lubuk ida ne’ebé hateten, sosiedade ohin loron lakoi atu ko’alia kona-ba étika no morál. No ha’u lakoi mo’ut iha prezume hirak ne’e, ne’ebé hafoin iha esplikasaun halai sees dook hosi kontestu.

Krítika nein iha Ligasaun uito’an ho étika: Reafirma pozisaun no kuriji naksalak!

DM tesi-kotu de’it fraze ida-ne’e no tau iha hakerek hodi halo jeneralizasaun ba kontestu hotu-hotu. Tanba de’it jeneralizasaun ne’e mak halo hakerek ne’e rasik lakon ninia diresaun. Ha’u tenta koko atu komprende.  Jeneralizasaun sira hanesan ne’e ita hanaran “extra dictionem”; 1. secumdum quid, no 2. ignoratio elenchi. (lee: Martin Suryajaya: 2022: 41).  Saida mak extra dictionem ne’e? Ida-ne’e signifika, “kesesatan” sira ne’ebé mosu liuhosi “keliru” ba substánsia matéria no ikus mai halo konkluzaun. “Kesesatan” saida mak DM halo?, Primeiru, tesi kotu fraze ida no foti konkluzaun hodi jeneraliza ba asuntu hotu-hotu (secumdum quid). Segundu, halo konkluzaun ne’ebé sees dook (meleset) hosi pontu importante/substánsia matéria sira-ne’ebé diskuti (ignoratio elenchi).

Iha Hermenêutica, ita la’ós de’it komprende fraze an sich no tenta konklui ona. Maibé, tenke hatene nia kontestu mós. Simples liu, mínimu lee fraze ida ita tenke hatene; testu, kontestu no intrepretadór (penafsir) rasik. Atu hateten, sira ida de’it ka labele husik malu. Ka boot liu karik, iha nivel hermenêutica, ita-nia nivel interpretasaun labele ida de’it, no mínimu ita tenta interpreta iha nivel haat ne’e, 1. nivel literál, 2. ontolojia, 3. istóriku-kulturál no 4. ezistensiál. (lee: Hermenêutica).

Saida mak DM hakerek ne’e, ignora kontestu no halo jeneralizasaun. DM tesi kotu liafuan oan rua, ‘krítika nein iha ligasaun ho étika no krítika nunka, i nunka fó solusaun’ hodi jeneraliza ba asuntu hotu-hotu. Nia keliru ne’e iha ne’e kedas no hahú hosi ne’e. Iha hakerek liubá, ha’u hatuur nia kontestu klaru, krítika iha estadu direitu. Krítika desizaun públika (lee halo didi’ak iha parágrafu dahuluk no daruak). Tan ne’e mak iha hahú, inisia kedas ho kontestualizasaun ba prinsípiu sira estadu direitu tuir Julius Stahl no A.V. Dicey. Iha mós pergunta  sira ne’ebé nu’udar giaun ba diskusaun nian (maibé DM ignora kontestu ne’e). Atu labele sees dook hosi substánsia ne’ebé diskuti, ha’u hatuur filafali pergunta hirak ne’e iha ne’e: Iha estadu direitu demokrátiku, bele ka lae halo krítika? Diferensa saida entre krítika no krítiku? Krítika ne’e parte hosi étika no morál?, tanba ne’e tenke krítika ho étika ka parte seluk ida?”

Hahún ba kontestualizasaun no pergunta hirak ne’e mak, to’o iha konkluzaun ida katak krítika nein iha ligasaun ho étika. Oinsá ha’u bele dehan ema ruma krítika tenke iha étika? Étika rasik ita defini nia nu’udar siénsia kona-ba morál; reflesaun kona-ba moralidade nst.  Iha DM nia hakerek mós halo definisaun barak loos kona-ba ida-ne’e (la presiza repete). Lójika simples, étika signifika siénsia kona-ba morál, nst. Krítika nia sentidu mak kuriji, avalia, sobu, dekonstrui. Nune’e krítika tenke iha étika, signifika “krítika tenke iha siénsia kona-ba morál”, atu hateten hanesan ne’e?  Se hanesan ne’e, cacat nalar. Sorin seluk, krítika ne’e parte hosi étika no morál? Lae! Krítika ne’e krítika, nia nu’udar atividade rásio nian hodi avalia naksalak sira mak  la tuir padraun sá de’it. Iha filozofia, krítika bele uza hodi halo ezaminasaun ka avalia ontolojia, epistemolojia no aksiolojia (lee: Kritisizmu). Loos katak, baze ba krítika mak padraun sira, norma sira (formál no informál) nst. Tan ne’e mak iha hakerek, ha’u dehan, bainhira ajente estadu ruma halo desizaun fora hosi padraun ka norma sira mak haktuir ka fora hosi sira-nia responsabilidade, tenke krítika. Keta haluha mós katak, iha Estadu Direitu norma ne’ebé ass liu mak, Konstituisaun. (Lee: Hans Kelsen).

Krítika nunka fó solusaun no krítika la’ós  konstrutivu!

Krítika fó solusaun ne’e la ezisti iha kontestu desizaun públiku (étika públika). Nune’e mós ho krítika konstrutivu. Tanba sá la presiza fó solusaun? Tanba, sira ne’ebé  halo desizaun públiku, estadu (povu)  finansia sira uza Orsamentu Jerál Estadu (lee: Kategoria OJE, saláriu no vensimentu) atu ba buka solusaun, la’ós husu solusaun. Magnis-Suseno dehan; “ Yang bertanggung jawab untuk memecahkan masalah adalah pimpinan bukan bahwahan” (Ida-ne’ebé reponsabiliza atu rezolve problema mak líder, la’ós subordinadu) (lee: Suseno, p. 42.). Afirmasaun mak hanesan, ko’alia mós hosi Rocky Gerung, Daniel Dhakidae no inteletuál progresivu sira seluk. Justru, tuir Daniel Dhakidae; la’ós krítika tenke konstrutivu ka krítika tenke buka solusaun, mas tuir nia “solusiona liuhosi krítika ka konstrui liuhosi krítika”.  

Tuir ha’u hatene, Prezidente Ditadór Soeharto de’it mak dehan krítika tenke iha solusaun. Esplisitamente, Soeharto dehan ‘kalau sanggup mengkritik harus sanggup menunjukkan mana yang baik’. Liafuan ‘harus sanggup menunjukkan mana yang baik’ hanesan mós krítika tenke fó solusaun ne’ebé konstrutivu. Se ita tuir lójika Soeharto, perigu tebes iha demokrasia moderna. Bele akontese, ema krítika la tuir selera mahukun ka la lori benefísiu polítika, sira bele konsidera ladi’ak ka anti etiketa no morál. Enkuantu, fó benefísiu ba sira-nia ukun, sira konsidera krítika konstrutivu. Ita haree dook liután, Soeharto ho nia aliadu sira halo ida-ne’e,  atu taka ema sira ne’ebé krítika nia ibun hodi halo ema hotu sai apolitis, atu nune’e sira bele mantein podér, fahe podér no haluan podér ba malu.

Iha kontestu estadu direitu demokrátiku, ita la la’o tuir lójika Soeharto, maibé firme ho hanoin ida katak, tenke krítika ba desizaun sira ne’ebé la tuir padraun étika públika. Ho lian seluk, krítika ne’e nu’udar konstribuisaun direta ida-ne’ebé povu bele oferese ba makaer desizaun sira, atu desizaun sira bele la’o tuir de’it dalan loos, tuir Konstituisaun haruka, la’ós kontribuisaun mak ida de’it, ne’ebé kada tinan-lima ba vota iha eleisaun (lee: demokrasia substansiál).  Nafatin hateten, krítika konstrutivu ka krítika fó solusaun ne’e contradictio in terminis.

Kona-ba pergunta sira hosi DM nian hanesan;  “La’os étika ho morál? Saida mak halo ita hatene katak jestaun, desizaun no distribuisaun ne’ebé governante halo ne’e la a favor ba bem-komun? La’os étika no morál? Saida mak ezije ita atu tau atensaun ba étika públika ne’ebé gere rekursu Estadu nian ho efikásia no efisiénsia? La’os étika no morál? Saida mak halo ita ezije katak asaun no desizaun sira governasaun nian tenke nakloke ba públiku? La’os étika no morál mak halo ita ezije? Tamba ne’e, tebes no loos ka la’e, “Krítika nein iha ligasaun uito’an ho Étika”? Hirak ne’e ha’u la presiza fó esplikasaun ka hatán, tanba konsidera nu’udar extra dictionem, ka fora hosi kontestu no konsidera nu’udar kekeliruan kona-ba substánsia matéria no konkluzaun ba ha’u-nia hakerek.

Keta haluha, iha estadu direitu demokrátiku, iha étika públika, kualkér desizaun públiku sá de’it hosi sé de’it ne’ebé la tuir padraun ka norma sira mak haktuir ka la tuir Konstituisaun, nia merese hetan krítika. No se husu solusaun, labele loos ona, entaun para hosi ita-nia kargu no fó ba ema seluk atu halo desizaun públiku ho integridade ba de’it interese bem comum.

 

KRÍTIKA, KRÍTIKU & ÉTIKA PÚBLIKA

 

KRÍTIKA, KRÍTIKU & ÉTIKA PÚBLIKA

Cesar Ferreira Amaral[*]

Timor-Leste (T-L) nu’udar estadu direitu demokrátiku. Tuir Julius Stahl, konseitu Estadu Direitu ne’ebé nia hanaran “rechtsstaat” kobre elementu importante haat (4) mak hanesan: (1) Protesaun ba direitus umanus, (2) Distribuisaun no separasaun podér, (3) Governa bazeia ba lei no (4) ‘administratieve rechtspraak’ (Peradilan Tata Usaha Negara).  Entretantu, A.V. Dicey esplika katak iha karaterístika importante tolu (3) iha estadu direitu idaidak ne'ebé nia bolu "The Rule of Law", maka: (1) Supremasia  Direitu, (2) Equality Before the Law (Ema hotu hanesan iha lei nia oin) , (3) Due process of Law (prosesu direitu ne’ebé justu). (lee. Jimly Asshiddiqie, p. 2-4).

Desizaun públika hotu-hotu tenke banati ba aspetu ka prinsípiu hirak ne’e no prinsípiu fundamentál hirak mak halulik iha Kontituisaun. Hodi realiza saida mak halulik iha Konstituisaun, estadu finansia funsionáriu ka ajente estadu sira liuhosi Orsamentu Jerál Estadu (OJE) kada tinan hodi reprezenta povu ba halo jestaun no desizaun sira, inklui distribui rekursu estadu nian ho loloos ba interese bem comum, tuir saida mak Konstituisaun dehan. Ema hirak mak estadu finansia uza OJE iha étika públika atu jere rekursu estadu nian ho efikásia no efisiente ba interese moris di’ak povu nian.

Iha ambiente estadu direitu demokrátiku, asaun no desizaun sira governasaun nian tenki nakloke ba krítika no ezaminasaun rasionál hosi parte hotu-hotu (laiha segredu ba desizaun públiku sira). Atu nune’e, karik asaun no desizaun públiku sira fora hosi saida mak konsagra iha Konstituisaun ka prinsípiu hirak iha leten mak, povu nu’udar na’in ba OJE iha responsabilidade morál atu krítika no fó hanoin krítiku ba desizaun sira-ne’ebé sira hanoin, hatene no senti katak la benefisia sira-nia moris di’ak, ka benefisia de’it grupu elite balun ho nia família sira.  

Iha T-L, ema barak sei kahur krítika hamutuk ho krítiku, krítika hamutuk ho solusaun, krítika hamutuk ho étika nst. Dalabarak ita rona, bainhira sosiedade sivil sira, ativista, akademista no sosiedade ein-jerál hato’o hanoin krítiku ruma, ka krítika ba desizaun naksalak ruma, ukun-na’in ho nia aliadu sira (buzzer) sempre hateten; “labele krítika de’it maibé tenke fó solusaun; krítika tenke iha étika, krítika tenke konstrutivu, labele krítiku, di’ak liu respeita ita-nia líder sira, tanba sira ita-nia aman, maun, bin no inan, sira idade boot liu ita, estuda tan lai, rai ó-nia matenek, morál laiha” no espresaun seluk tan. Sorin seluk, sosiedade ne’ebé halo krítika barak, ema (sira mak defende ukun-na’in) sempre hateten “ne’e milísia, la hatene agradese, la respeitu ema-boot no tenta halo rasionalizasaun oioin ka ho lian-seluk defende mate bandeira huun.

Iha estadu direitu demokrátiku, bele ka lae halo krítika? Diferensa saida entre krítika no krítiku? Krítika ne’e parte hosi étika no morál?, tanba ne’e tenke krítika ho étika ka parte seluk ida? Pergunta hirak ne’e ita presiza haree filafali ho fundamentu filozófiku atu labele monu iha falásia lójika (lee. logical fallacy).

Diferensa Krítika no Krítiku

Krítika nu’udar esforsu ema nian hodi hatudu katak (hanoin, desizaun, ko’alia ka asaun) hirak ne’e sala no laiha lójika tanba la la’ó tuir saida mak ideál ka teoria ou prinsípiu ruma mak defini ona. Iha lójika, krítika ne’e parte importante atu avalia katak, pensamentu ka sintéze ida-ne’e la loos tanba, ida, konkluzaun fora/sees hosi premisa sira, rua, ita-nia premisa ne’ebé forma mak sala, ka la tuir padraun ka regra sira silojizmu nian. (lee. Lójika formál;silogismo). Se nune’e krítika tenke fó solusaun? Lae, krítika nia natureza dekonstrutivu (lee. dekonstrutivizmu; J. Derrida). Solusaun nia natureza konstrutivu. Nune’e “krítika ne’e nunka no nunka i nunka fó solusaun!”.  Krítika ne’e sobu, destrui, harahun. Solusaun ne’e harii, dezenvolve, rezolve. Labele kahur.  Nune’e, krítika tenke fó solusaun ka krítika konstrutivu ne’e iha lójika konsidera nu’udar “Contradictio in Terminis”/ (kontradisaun entre/iha  termu sira). Parte seluk, ema krítika ita, ita tenta ataka ema-nia personalidade, hanesan dehan ema beik-teen, milisia, lahatene-an, nst. Hirak ne’e parte hosi “ad hominem fallacy”, no ida-ne’e iha lójika konsidera nu’udar parte hosi logical fallacy / falásia lójika.

Beibeik ona ita kahur entre “krítika” ho “krítiku”. Ita hanoin katak, krítika ne’e mak krítiku ka vise-versa. Krítiku nu’udar atitude filozófiku ida ka karatér báziku filozofia nian. (lee. filozofia). Hanesan Magnis-Suseno hatete “Filozofia nu’udar arte krítiku”. Krítiku ho nia sentidu katak, filozofia nunka satisfeitu ba saida mak nia iha, nunka husik saida mak nia hetan ne’e nu’udar rezultadu finál, la korta diálogu ka ema ko’alia,  sempre nakloke no kontente atu re-avalia no halo filafali diskusaun ba asuntu saida de’it, sempre “dialétika”. Atu hateten, verdade hotu sai verdadeira  iha de’it sirkulasaun Teze, Anti-teze no Sintéze . (Suseno, 1992, p.21).

Em summa, hanoin krítiku (critical thinking) ne’e katak, hanoin ho baze rasionál (lójiku), sistemátiku no fundamentu no la fasil atu simu no tolan tomak de’it. Kualkér opiniaun, ideia, informasaun nia semo lais liu no fasil influénsia ema-nia maneira hanoin no desizaun. Tanba ne’e, atu opiniaun, ideia, informasaun laloos sira labele influénsia ema seluk nia maneira hanoin no desizaun ho lalais mak, krítiku nu’udar “filter” hodi ta’es atu ema labele monu lalais ba buat hirak ne’ebé laloos. Atu dehan, krítiku la’ós krítika. Simplika, krítika ne’e kuriji (avalia) naksalak sira, no krítiku ne’e ita la simu de’it naksalak sira, inklui realidade hotu maibé tenta hanoin ho kle’an, hateke hosi orizonte oioin no holístico, inklui halo análize no aprezenta nia sintéze ho rasionál, sistemátiku no fundamentu. Ita bele halo krítika uza hanoin krítiku.

Krítika tenke iha étika?

Ita sempre rona fila-fila liafuan ida-ne’e banhira ita krítika desizaun ruma ne’ebé la pro povu no justisa. Krítika nein iha ligasaun uito’an ho Étika. Inteletuál Boot Indonézia nian Daniel Dhakidae dala ida iha Narasi.Tv dehan “kritik harus tajam menghujam, menguluti apa yang tersurat dan menohok yang tersirat. Menjelujur hingga jantung persolan”. Étika nu’udar filozofia morál ka konsidera nu’udar siénsia kona-ba morál.(lee; siénsia).  Atu hateten, étika nia papél mak halo krítika ka kestiona filafali baze no prinsípiu morál sira mak ezisti ona ho finalidade ida katak, sujeitu (ema) mak la’o tuir norma morál ida, la’ós tanba ema haruka ka tanba ta’uk, maibé nia iha responsabilidade no konsientemente kona-ba saida mak loos no sala, di’ak no ladi’ak, nune’e nia la’o tuir (tuir nia super ego), atu, karik iha futuru nia halo sala nia iha devér atu responsabiliza ba nia sala sira. Ho lian seluk, étika nia funsaun mak kestiona filafali ho baze rasionál ba ezisténsia morál. Nune’e bainhira ita ko’alia katak krítika tenke iha étika, ita rasik komprova ita-nia an katak ita ki’ak ida definisaun konseituál sira ka simplesmente la hatene kona-ba étika no krítika.

Krítika no Étika Públika

Iha sosiedade demokrátiku, étika públika importante tebes atu funsionáriu ka ajente estadu ida kumpri no la’o tuir. Étika públika nu’udar étika deontolojia (lee. Immanuel Kant). Ajente estadu sira-ne’ebé serbí estadu (povu) mak finansia hosi OJE iha responsabilidade hodi hala’o sira-nia funsaun tuir étika deontolojia. Kant dehan, asaun morál sira-ne’ebé ita halo, ninia valór la’ós haree hosi nia rezultadu, maibé hosi kedas ita-nia “hanoin”. (lee. Crítica da Rasão Prática; Kant). Se ita-nia hanoin ladi’ak, biar lori rezultadu di’ak, tuir Kant nia laiha valór.  Iha kontestu polítika públika, étika públika hanesan reflesaun ida hosi padraun/norma sira-ne'ebé determina di'ak/aat,    loos/sala kona-ba hahalok, asaun no desizaun sira atu dirije polítika públika hodi bele implementa responsabilidade sira servisu públiku nian.( lee. Haeli, p.7).  Padraun/norma hirak ne’e dalabarak liu defini iha kódigu konduta (kode etik). Nune’e se ajente estadu ida, bainhira nia hala’o ninia servisu iha funsaun públiku, nia tenke husik nia asuntu privadu sá de’it no sei tau aas interese komum (summum bonum). Atu hateten, étika públika forma integridade iha atendimentu públiku.

Ne’eduni, banhira funsionáriu ka ajente estadu (ukun-na’in) sé de’it ne’ebé hala’o nia responsabilidade la tuir padraun ka norma sira mak hatuur, ka la tuir saida mak Konstituisaun dehan, povu nu’udar na’in iha estadu direitu iha responsabilidade atu krítika. Ita la presiza hateten, atu ema ne’ebé halo krítika tenke buka solusaun ka la presiza ko’alia ema ruma katak urus lai nia an. Povu urus an rasik ne’e asuntu privadu ida, maibé ukun-na’in nia desizaun sira, ne’e asuntu públiku. Nune’e alerjia ba krítika hatudu ita ta’uk atu lakon podér. Dalabarak mós ita sempre rona, barak hateten ema ruma mak krítika ukun-na’in ruma, ne’e laiha morál, ita haluha katak ukun-na’in nia desizaun públika ne’ebé haterus ema barak ne’e moralmente aat tebetebes no aat liu. Tuir loos, ita tenke konsidera krítika nu’udar vitamina, la’ós virus. Krítika no hanoin krítiku nu’udar fuan no oksijéniu ba estadu direitu demokrátiku. (lee. liberdade espresaun). Krítika nu’udar parte esensiál hodi trava podér hirak ne’ebé iha tendénsia absolutizmu, favoritizmu, kronizmu, inklui Korrupsaun, Koluzaun no Nepotizmu iha estadu direitu demokrátiku hodi la’o tuir dalan loos (étika públika) ba to’o demokrasia substansiál. La ho krítika estadu iha tendénsia ba totalitarianizmu.  Ne’eduni, ho krítika ita promove kultura demokrasia. Anti-krítika no pensamentu krítiku signifika anti-demokrasia.

 

---

[*] Alumnu Faculdade de Filosofia e Ciências Humanas (FFCH), UNTL. Atuál dosente transversál iha UNTL.

EDUKASAUN IHA TIMOR-LESTE: ENTRE LIBERTASAUN KA KOMPETISAUN?

EDUKASAUN IHA TIMOR-LESTE: ENTRE LIBERTASAUN KA KOMPETISAUN?

Cesar Ferreira Amaral[*]

Tinan-tinan instituisaun akademia sira iha Timor-Leste sempre halo graduasaun ba grau akadémiku lisensiatura no Pós Graduasaun. Graduasaun nu’udar faze ida, universidade husik ona universitáriu fila ba sosiedade, hodi serbí sosiedade tuir Magna Charta Universitatum (Bologna, 1988) dehan, bele mós konfere sentidu graduasaun (toga no mundansa fita)? Dalaruma maneira atu serbí mak diferente, entre serbí povu no osan-na’in.

Ema barak festeza loron ida-ne’e nu’udar susesu, tanba tinan-barak senti terus oioin iha universidade (motivasaun klásika). Ema balun mós hahú hanoin, hafoin sei servisu iha-ne’ebé? Ema balun haklalak hodi simu, bemvindu mai komunidade dezempregu.  Maski nune’e, ho oklu diferente hakarak hahú kestaun krítiku balun hanesan, hafoin termina kursu iha nivel ida-ne’e, sá mak ha’u bele kontribui ba sosiedade, ka ho lian-seluk saida mak ha’u bele halo hodi serbí ha’u-nia sosiedade?

Mindset sira mensionadu, la’ós simplesmente horik mesak, tanba ema hirak-ne’e nu’udar individuu ne’ebé konxiente, tanba ne’e normál bainhira ko’alia no halo asaun hanesan ne’e, maibé ne’e forma hosi kondisaun estruturál no sistemátiku ida. Atu hatene ida-ne’e ita presiza husu, edukasaun atuál (nivel ensinu médiu no superiór) forma ema sai kompetidór ka sai libertadór ?  Kompetidór iha kontestu bele kompete iha merkadu traballu no libertadór iha kontestu livre hosi dominasaun no esplorasaun sá de’it, iha aspetu ekonomia, polítika, sosiál no aspetu sira seluk.

Hatán kestaun boot iha leten, ita presiza haree filafali epistemolojia no ontolojia hosi edukasaun rasik. Edukasaun nu’udar instrumentu libertasaun ka nu’udar instrumentu kompetisaun? Haketak definisaun rua ne’e la’ós simplesmente, por definisaun, maibé inklui sistema sira mak tulun (supra no infra estrutura) no mós sujeitu sira mak kontribui. Se konsidera edukasaun nu’udar instrumentu libertasaun mak, iha prosesu hotu, sistema sá de’it inklui sujeitu (dosente no alunu/a) sira tenki libertadu. Liberdade iha kontestu ida-ne’e mak, livre iha hanoin, ko’alia, espresa opiniaun ho krítiku ka boot liu livre hosi hegemonia, ignoránsia no sistema esploradu sá de’it. Kontráriu hosi ida-ne’e mak, edukasaun sei prodús graduadu/a sira ba serbí de’it interese osan-na’in nian. Ka ho kasar liu, sei sai de’it mákina hodi serbí iha merkadu traballu ka serve kapitalista.

Dewey dehan,  edukasaun ideál mak, ida-ne’ebé forma ema sai sujeitu ne’ebé iha liberdade (producess free person) la’ós prodús ema ba interese merkadu. Se ba interese merkadu mak, espíritu ‘lakon’ no ‘manan’ (kompetisaun) mak domina. Iha sosiedade antiga (filózofu Ionia) sira uza “lójika survival” nu’udar sira-nia maneira moris. Atu hateten, ida-ne’ebé forsa liu nia mak sei ukun no sira konsidera ida-ne’e justu liu. Nune’e iha sira-nia sistema sá de’it, inklui polítika, edukasaun, direitu nst orienta tuir lójika ida-ne’e.  Lójika “funu-malu” ida-ne’e, sosiedade husik ona iha era renasimentu to’o ohin loron. Iha sékulu-19 liubá sosiedade hahú hanoin kona-ba edukasaun nu’udar instrumentu ida ba libertasaun. Hosi Marx to’o Freire sira konkorda katak, edukasaun ne’e libertasaun no produtu edukasaun tenki serbí ba sosiedade.

Marx iha nia fraze famozu ida dehan “koñesimentu sei folin liu bainhira uza hodi liberta ema seluk”, nia sei la folin bainhira nia hamriik mesak nu’udar siénsia an sich. Serbí ema seluk iha kontestu ida-ne’e mak, sosiedade oprimidu, marjinalizadu no esploradu hosi sistema kapitalista nian. Atu to’o iha libertasaun ida-ne’e, Freire dehan, iha prosesu ensinu no aprendizajen estudante tenki livre. Livre iha aspetu hanoin, ko’alia, halo, espresa hanoin krítiku no livre hosi presaun sá de’it. Estudante deve ser sai sujeitu sentrál, mestre/a ka dosente sira sai de’it matadalan/fasilitadór. Se sees hosi hirak ne’e mak, estudante sei sai de’it bankeiru ba depózitu inteletuál.

Durante tinan-22, edukasaun Timor-Leste la’o ho ideolojia edukasaun ida-ne’ebe?

Ideolojia edukasionál Timor-Leste nian la klaru. Entre libertasaun iha prosesu aprendizajen no kompetisaun, ida-ne’ebé malorek (ita bele haree hetan lalais) liu mak kompetisaun. Ne’e la’ós mosu mesak, maibé ditadu hosi kolonializadór sira (maski na’in la prezente maibé espirítu sei prezente), liuhosi hatama sira-nia kanuru-tohar iha dezeña kurríkulu nasionál sira, inklui sistema no polítika edukasionál. Indikadór hodi sukat ida-ne’e mak saida? Ida, bele haree ezame nasionál (kompetisaun klasifikasaun), rua, bele haree konteudu kurríkulu ne’ebé benefisia ba interese merkadu, tolu, laiha oportunidade natoon atu estudante livre ba diskuti, tanba tenke aprende matéria full iha aula, hosi dadeer to’o lorokra’ik. Haat, iha sala aula estudante balun sei ta’uk atu ko’alia, hanoin diferente ho mestre/a ka dosente, barak sei submete no tenta nonok ba kondisaun injustu sira (lakon abilidade krítiku). 5.) Mestre/a no dosente barak sai de’it sales product; fa’an produtu merkadu nian ne’ebé osan-na’in hatama iha kurríkulu, ba estudante sira. Iha indikadór seluk tan inklui kondisaun seluk ne’ebé favorese de’it ba lójika kompetisaun ka survival.  

Saida mak ita presiza iha edukasaun atuál?

Sekúlu-21 oferese ba ita atu promove pensamentu krítiku, komunikativu, kolaborativu no kreatividade. Atu to’o hirak ne’e, ita presiza edukasaun ida-ne’ebé livre. Livre iha aspetu hotu-hotu; alunu/a sira senti enjoy iha prosesu ensinu no aprendizajen, sente konfortavel ba hato’o hanoin diferente, mestre/a sira nakloke-an ba krítika sá de’it hosi estudante sira. Laiha superioridade iha klase-laran. Mannheim (1972) no Perrenoud (2005) dehan, eskola/universidade/institutu sira nu’udar espasu ba diálogu. Eskola tenke sai demokrátika, nune’e bele ezisti diálogu ho família no alunu/a sira hodi kontribui ba hamatas auto-konfiansa no abilidade krítiku estudante sira-nian.  Iha diálogu nia laran la ezisti superioridade, nune’e ema hotu livre espresa no diskuti asuntu sá de’it no ho sé de’it. Superioridade sei hamate pensamentu krítiku.

Boot liu hosi hirak ne’e mak, ita-nia sistema edukasaun tenki hamosu estudante sira-sai ema ne’ebé krítiku, hodi hanoin no foti asaun kona-ba kondisaun sosiál povu marjinalizadu, oprimidu no esploradu nian. La to’o de’it hanoin kona-ba nia an, nia família no promove status quo. Mestre/a no dosente sira tenki tulun estudante sira iha prosesu tomak hodi empatia ba kondisaun sosiál hirak ne’e. Estadu tenki tulun mestre/a ho dosente sira atu sai edukadór ida kualidade, hadi’ak sira-nia kondisaun moris. Vokasaun manorin sira-nian atu serbí sosiedade, la’ós serbí governu sá tan sai sales product ba osan-na’in. Manorin sira tenki independente iha hanoin, ko’alia no asaun la’ós ditadu hosi grupu ida rua. Edukasaun tenki progresivu, la’ós tradisionál (lee Gramsci). Peter McLaren (1989) dehan pedagojia deveria ser ho modelu “krítiku-revolusionáriu”.

Haree ba situasaun atuál iha ita-nia rain, tinan-tinan ita halo graduasaun, nune’e ita presiza husu filafali, hafoin remata estudu ita sei halo saida, iha ne’ebé no serbí ba sé nia interese? Parabéns ba graduaduadu/a sira. Espera ita uza ita-nia koñesimentu hodi liberta ita-nia sosiedade.

---

[*] Alumnu Faculdade de Filosofia e Ciências Humanas (FFCH)-UNTL, atuál dosente transversál iha UNTL