“Siénsia nia ezisténsia labele ezisti tuir nia nesesidade
rasik. Hirak ne’ebé konsege dedika sira-nia an hodi la’o tuir siénsia, dahuluk
liu tau sira-nia koñesimentu hodi serbí ba povu. Serbisu bodik ba Povu.”
(Karl Marx)
Rezumu
“Ema”, kestaun
filozófiku ida-ne’ebé to’o dadaun ne’e Filozofia rasik seidauk hetan resposta ida-ne’ebé aseitavel
no universalmente ka sientífikamente ema hotu uza. Preokupasaun kona-ba ema
hahú kedas ona hosi idade antiga to’o mai idade dadaun ne’e nian. Filozófu
lubuk ida maka fó sira-nia preokuasaun kona-ba ema. Marxistas no Tomistas,
Evolucionistas no Espritualistas, Ateus no Kristaun sira ne’e hotu preokupa
kona-ba ema, no sira konkorda ba malu atu hala’o estudu no peskiza kona-ba ema
no nia orijinalidade; esénsia, substánsia no totalidade, no konsidera hirak
ne’e hanesan sira-nia objetu sentrál iha sira-nia peskiza. Iha idade antiga,
Platão (427-347 m.K) rasik ko’alia kona-ba klamar ne’ebé la mate (imortalidade da alma). Hanoin ida ne’e
Platão deskreve iha nia Livru Fédon ne’ebé
iha ne’ebá nia define ema ho forma dulismo
( klamar no isin ketak-ketak). Platão laiha nia Livru ne’ebé hakarek kona-ba
ema, maibé nia ko’alia uito’an kona-ba klamar ne’ebé iha nia relasaun ho nia
hanoin ida seluk kona-ba mundo das ideias,
iha nia Livru República. Nia haka’it
klamar hanesan ho Ideia. Platão Filózofu ida úniku ne’ebé konsege hateke ema
nia orijinalidade hosi lidun rua(dualismu). Hodi fundamenta autór ne’e nia
hanoin, iha ne’e mós haree kona-ba Aristóteles nia hanoin ne’ebé dehan ema ho
forma (monismu) klamar no isin ida de’it ne’ebé forma unidade substansiál, S.
Tomas de Aquino ne’ebé ho firmeza dehan, “ema iha klamar ida deit” nune’e mós
“forma ida deit (klamar rasik)” ne’ebé klamar rasionál dezempeña funsaun
vejetativa no sensitiva dala ida, nune’e mós René Descartes nia hanoin kona-ba
esénsia ema nian, ne’ebé dehan, esénsia ema nian ne’e iha “hanoin” ne’ebé
movimenta hosi klamar rasik. Maske iha diskusaun sira hamosu opiniaun ne’ebé
diferente kona-ba “ema”, mas konkluzaun hosi sira katak esénsia ema nian maka
klamar ida ne’ebé la mate, infinita no invizivel (la haree).
Liafuan Xave: ema, esénsia,
substánsia, dualismu, Platão.
I.
Introdusaun
“Ema” hanesan
animál ida hosi animál sira seluk ne’ebé úniku mak bele halo kestionamentu ka
halo pergunta ou mahusuk sira, animál seluk (fahi, bibi, karau, manu, nst) la
halo atividade ida ne’e (kestiona). Nia bele kestiona ka husu kona-ba nia
an-rasik (nia ‘ema’ ne’e sé?), nia
ezisténsia (tanba sá nia moris ou ezisti?) no nia mundu ( nia sei halo no buka
saida iha mundu, no nia sei bá ne’ebé?). Maske situasaun ida ne’e simples,
maibé atividade hirak ne’e hetan ona preokupasaun hahú kedas hosi mundu ne’e
hahú, ka em termos filozofia nian,
hahú kedas hosi idade antiga to’o ohin loron (kontemporánea). Ita koko hateke
ba labarik ki’ik, sira haree buat ruma ka buat saida de’it sira sempre halo
kestionamentu. Ida ne’e la’o durante faze dezenvolvimentu labarik nian no to’o
remata.
Ho razaun hirak
ne’e hotu maka to’o daudaun ne’e, ema rasik nafatin buka tuir nia
orijinalidade, ezisténsia no nia globalidade. Ema hahú hamosu kestaun ba ninia
an-rasik hanesan, sé mak ha’u? Ha’u mai hosi ne’ebé? Ha’u sei halo saida? No
ha’u sei bá ne’ebé?. Kestaun hirak ne’e hotu ema komesa husu no husu bebeik
to’o dadaun ne’e.
Preokupasaun hirak
ne’e atu bele hetan fatin iha Filozofia nian maka, Filozófu sira sistematiza
tiha kestaun sira ne’e iha disiplina ida naran Antropolojia Filozófika. Iha
disiplina ne’e, Filozófu hotu sistematiza sira nia pensamentu ba de’it “ema”. Hahún
ba baze istórika nian, hahú kedas hosi idade antiga to’o idade
kontemporánea ne’e, filózofu no sientista sira hala’o ona estudu no kontinua
hala’o estudu kona-ba ema, no buka atu fó definisaun ida ne’ebé aseitavel ba
ema nia globalidade; Natureza ka esénsia, no ema nia orijinalidade, fim no ultímo.
Iha inísiu idade
moderna nian, ema ka filózofu sira husik hela hanoin sira uluk ne’ebé
sentraliza de’it ba cosmocêntrica hosi
filózofu grego no teocêntrica hosi
Autór kristaun sira, no ema ka filózofu modernista sira adota hanoin foun hodi
sentraliza sira-nia hanoin ba de’it ema ka antropocêntrica;
ema mak sai pontu partida iha investigasaun ka peskiza sira filozofia nian.
Existencialistas no Estruturalistas, Marxistas no Tomistas, Evolucionistas no
Espiritualistas, Ateus no Kristaun, sira ne’e hotu konkorda atu hala’o estudu
kona-ba ema no fó importánsia ba ema hodi sai objetu sentrál iha sira-nia
estudu.
Maske tinan barak
sira hotu hala’o estudu kona-ba ema, no lori sira nia preokupasaun sentraliza
de’it ba ema, maibé to’o dadaun ne’e nafatin la hetan no laihá resposta ida
ne’ebé aseitavel no universalmente ema hotu uza no la’o tuir, maibé
subjetivamente sira ida-idak define globalidade ema nian tuir sira ida-idak nia
hanoin no hatene.
II. Sé mak ema tuir Platão nia hanoin? 2. Nia (ema) nia
“esénsia” no “substánsia” mak saida?
Tuir disionáriu
Filozofia Lorens Bagus (2005), define konseitu “ema” hanesan; man (ing.), nia fraze báziku mai hosi
lian Anglo-saxono, (mann). Nia
signifikadu hosi fraze báziku ladun klaru, maibé bele haka’it ho lian lat.(mens), signifika “Ser ida-ne’ebé iha pensamentu”. Nune’e mós
hanesan ba termu antrophos (gr.).
Foufoun liafuan antrophos signifika
“hateke ka haree ba leten”, maibé dadaun ne’e termu ida ne’e uza hodi fó
signifika ba ema nia oin. No hafoin, sai hommo
(lat.), signifika “ema ne’ebé moris iha mundu”.
Iha definisaun
barak maka ko’alia kona-ba ema, maibé definisaun hirak ne’e barak liu ko’alia ka fó hosi matenek-na’in ka filózofu
kristaun sira, hanesan ita bele haree definisaun famozu kona-ba ser umanu
(pessoa) hosi Severino Boécio ne’ebé
dehan:
“a pessoa é o
indivíduo subsistente numa natureza racional [...] pessoa é a
união do espírito com o corpo, ou seja, o espírito define a especificidade
humana. Portanto, a alma racional nos diferencia radicalmente dos outros seres
vivos”. (Pegoraro, 1999, p. 2.)
Konseitu “ema”, hahú hosi ema iha, ema rasik komesa buka
no kestiona tuir ninia orijen (gênese).
Hosi kedas idade antiga (Sek. III-II m.K) matenek-na’in ka Filózofu sira hahú
deskobre kona-ba orijen hosi ema, liuhosi métodu oin-oin no diferente (ez.
reflesaun, meditasaun) no seluk tan. La’ós de’it Filózofu sira maka koko atu
hatene kona-ba ema, maibé hafoin idade média (Sek. XIV-XV h.K) Igreja mós hola
papél fundamentu ida hodi haree kona-ba orijen hosi ema. Maibé lá signifika ema
sai kestaun prinsipál ne’ebé ema ko’alia iha idade medievál. Pelo Contrario iha idade média, ema, liuliu
Autóridade Igreja nian fó importánsia maka’as tebes ba Maromak, no konsidera
Nia sai sentru ba buat hotu.
Mas realmente problema kona-ba ema nafatin sai kestaun
ida ne’ebé to’o ba dadaun ne’e seidauk iha definisaun ida serteza ka loloos,
nune’e hodi ema rasik (Filózofu no Antropólogu) ka sientista sira nafatin koko
hodi deskobre kona-ba sé mak ema ne’e rasik. Maske seidauk iha definisaun ida
hodi sai nu’udar definisaun universál no objetivu, ema ka filozófu koko defini
ema mai hosi sikun oioin. Nune’e halo ema sai hanesan ser ida-ne’ebé riku iha
definisaun, signifika iha dimensaun barak atu esplika kona-ba ema.
Hanesan hanoin
Filózofu Edvino Rabuske nian ne’ebé Paulo Airton Hartmann, (2012) deskreve iha
nia monografia, hateten:
[...] O ser humano é um ser rico, pois apresenta
múltiplas dimensões. O homo sapiens, que conhece, o homo ludens, que brinca, o
homo loquens, que fala, o homo faber, que trabalha, o homo volens, que quer
etc”... . (Hartman, 2012, p. 12.).
“Ema” sai sujeitu
ida ne’ebé diferente ho ser ezistensiál sira seluk (sasan, fahi, kuda, bibi,
ai-horis, nst.) Ema okupa pozisaun ida-ne’ebé úniku no previléjiu liu ser
seluk. Ema iha pensamentu no sentimentu (Aristóteles) no ezistensiálmente nia
okupa espasu no tempu. Ema sai sujeitu ida-ne’ebé hetan preokupasaun hosi nia
an-rasik no nia maluk sira ba nia relasaun ho Cosmos (mundu), Theos (Maromak),
no mós nia relasaun ho ser seluk (antrophos) ka “outros seres”. Ohin Problema barak mosu tan iha ema. Konseitu
“ha’u”, “ó” no “nia” mosu atu hatudu nia “diferente” no “relasaun” ho ser seluk
ontolójikamente no ezistensialmente. Ha’u sai “ha’u” tan iha “ó”, no ha’u bolu
hodi sai “ha’u” bodik ba “ó”.
Ezistensialmente
ema preokupa ho nia moris tan nia iha limite “mate” (Sofyan, 2010, p. 156.).
Konseitu “mate” ema hatuur ba ema nune’e mós ser seluk bainhira ema no ser
refere termina liafuan “movimentu/book-an” no “mudansa”. Nune’e mós tan ema iha
limitasaun (mate), hodi ema rasik iha “planu” ba moris iha loron “ohin” no
esperansa ba “futuru”. Problema barak
kona-ba ema hatuur liuhosi istória ema nian, ne’ebé láo tuir espasu no tempu.
Tempu muda istória ema nian muda, no ema evolui ka muda nia an tuir tempu. Tan
ne’e definisaun no kestaun kona-ba ema nafatin ba nafatin buka atu hatene tuir,
tuir tempu no espasu ne’ebé ema ka ser ne’e hela ba.
Matenek-na’in ka
Filózofu sira defini ema tuir idak-idak nia pensamentu ka hanoin hanesan iha
parte introdusaun ne’ebé fó hatene mai ita kona-ba matenek-na’in sira-nia
hanoin kona-ba ema rasik. Autór
barak hamosu termu oioin hodi define ema tuir dimensaun oioin no
diferente hanesan Homo Sapiens, Homo
Volens, Homo Socialis, Homo Cultural, Homo Faber no seluk tan. Konseitu
hirak ne’e hotu bele lee nia signifikadu interpretasaun kompletu iha ha’u nia
monografia orijinál.
Ita husik tiha koñesimentu ba konseitu sira, ita koko sani uito’an hanoin
teóriku balun ne’ebé relevánsia ho “ema”.
Iha Teoria barak tebes mak hatuur iha Antroplojia Filozófika nian relasiona
ho teoria kona-ba ema rasik. Teoria hirak ne’e hakerek-na’in identifika de’it
balun, tuir saida mak hakerek na’in konsidera relevánsia no importante. Teoria
hirak ne’e mak; “Ema hanesan
Personalidade”, “Isin no Klamar”, “ema no nia relasaun”.
Ema hanesan
Person/Personalidade/Privadu ne’e hanesan
dimensaun ida hosi dimensaun seluk ema nian ne’ebé báziku liu. Hanesan
“privadu” ida, ema iha nia kapasidade atu desidi nia an-rasik ka nia moris. Nia
iha nia ezisténsia ne’ebé naturál kompara ho animál sira seluk. Problema sira
hanesan, saida mak sai esénsia ema nian nu’udar privadu ka person ida? Saida-saida de’it maka sai problema valores ema nian? No elementu-elementu
privadu saida de’it mak hola parte iha moris ema nian lor-loron? Pergunta hirak
ne’e hotu hakerek-na’in sei rezolve iha pasu sira tuir mai[4].
Hosi teoria ne’ebé
fihir personalidade ema nian ka ema hanesan person
ka personalidade ida, iha ne’e hakerek-na’in sei hakerek no haktuir iha
pasu sira tuir mai kona-ba personalidade ema nian nu’udar “individu”. No hosi konseitu ne’e, sei hateke mós hosi lidun rua;
dahuluk sei haree no halo komparasaun ba Individu infra-humanu no daruak sei
haree kona-ba individu humanu / ema nu’udar individu ida.
Konseitu infra-humanu, dalaruma ita nunka rona
iha sosiedade nia leet (liu-liu ema ne’ebé nunka estuda Filozofia), difisil
uito’an atu halo tradusaun ba konseitu ida ne’e, maibé hakerek-na’in komprende
konseitu ida ne’e nia sentidu interpretasaun, katak konseitu ida ne’e refere
liu ba ser materiál ka sasan sira ne’ebé nia grau iha ema nia okós, hanesan
(hudi, fehuk, batar , aifarina, nuu no sira seluk). Ita haka’it termu
“individu” ho termu infra-humano hodi
sai konseitu ida de’it “individu infra-humano”maka
nia sentidu nakfilak-an ho nia signifikadu seluk ne’ebé dehan, sasan sira
hanesan hudi, fehuk, batar, ai-farina nuu no sasan sira seluk iha “individu”
iha sira nia ezisténsia. Signifika katak sira idaidak iha nia identidade rasik
ne’ebé labele fahe ka iha lian lat. “indivere”. Ba ser infra-humano, definisaun ba “individu” relasiona ho sira nia “tipu
ka espésie” (Sihotang K., 2009, p. 32.). Ita bele halo diferensia “hudi” ho
“nuu” liuhosi sira nia espésie. Banhira
ita dehan ita iha hudi hun haat, maka ita iha “individu” hudi haat, nune’e mós
ba nuu. Sorin seluk ita só bele halo diferensia individu hudi ho nuu liuhosi
marka númeru ba sira (kuantidade). Maske ita hatuur númeru ba nuu ka hudi, la
muda espésie nuu no hudi nian, nu nafatin ho nia individu rasik nune’e mós ba
hudi. Signifika katak ita hatuur númeru hirak ne’e laihá relasaun ho kualidade,
maibé kuantidade.
Diferente loos
bainhira ita uza termu “individu” haka’it ka relasiona ba “ema/humano” ne’ebé
iha Antropolojia Filozófika bolu “individo
humano”. Ita define individu ba ema la’ós ona hateke hosi kuantidade
númerika hanesan haktuir iha leten, maibé kualidade. Ita define termu individu
ba ema, nia relasaun la’ós de’it iha espésie, nune’e mós la’ós de’it marka
númeru. Individu ema nian ne’e hahún ba nia “úniku”. Úniku ida ne’e nia abut
iha dimensaun espirituál. Hanesan Individu ema nia espésie hanesan, maibé nia
valór lahanesan espésie ne’ebé nia iha. Individu ema nian relasiona ho
“kualidade” ne’ebé ema ida iha. Ne’eduni “individu” ema nian la’ós de’it hateke
hosi aspetu fíziku hanesan, oin di’ak, fuk modelu oioin, maibé “individu” ema
nian ka individu umanu ita hateke hosi saida mak ema ne’e “iha” ka kualidade
ema ne’e nian ou kualidade úniku ida-ne’ebé hafoun hela de’it ka mudansa hosi ema ida. Ita hateke hosi
lidun materiál, ema mai ho individu ida, mas hateke hosi lidun esprituál ema
mai ho totalidade ida-ne’ebé úniku. Ne’eduni diferensa entre individu
infra-umanu no umanu ne’e iha nia “grau”. Signifika katak, grau ba kualidade no
individu ema nian aas liu kompara ho infra-umanu. Individu ema nian hahún ba
grau no dignidade, nune’e mós ba saida mak ema ida halo, maibé ba infra-humano, nia sasukat mak kuantidade
materiál.
Ladún iha
diferensa ne’ebé boot liu banhira ita hakesi termu “personalidade” ba ema. Uluk
liu liafuan “personalidade” ema uza ba iha mundu filme nian, liga ba ema sira-ne’ebé
sai personajen prinsipál iha filme ruma, ne’ebé sempre uza “oin falsu” hodi reprezenta ema ne’ebé nia reprezenta hodi hamosu
ilas foun hanesan ho ema ne’ebé nia reprezenta. Ohin loron, termu ne’e nia
definisaun seluk uito’an, signifika hosi liafuan ida ne’e dehan katak esénsia
hosi ema ida nian (ema nia an-rasik). Iha filozofia liafuan “personalidade”
ne’e refere ba ema nia “úniku”. Ema ida úniku, tanba laihá ema ida hanesan nia.
Ema bele “kaduak” maibé hanesan iha fíziku, no diferente iha kualidade no
espirituál.
Ita husik tiha
teoria ne’e, ita hateke fali teoria seluk ne’ebé hateke ema iha isin no klamar. Interesante
uito’an teoria ida ne’e, tanba ita bele hetan netik ponto de arranca Platão
nian kona-ba “dualismu”. “Isin” no
“klamar” hanesan totalidade ida-ne’ebé forma personalidade ema nian, no ita
labele ko’alia isin sem klamar. Ita labele dehan “ema” hanesan “ema” sé nia
laihá klamar. Pergunta sira mosu hanesan, saida mak isin no klamar? Hodi
resposta ba pergunta ida ne’e, iha ne’e hakerek-na’in koko lori mós korente
pensamentu rua ne’ebé konsidera importante tebes atu ita haree iha espasu ida
ne’e hanesan monismu no dualismu.
Monismu no dualismu
hanesan korente pensamentu rua ne’ebé fó perspetiva ba “isin” no “klamar” nian
ne’ebé sira nia ideia kontraditóriu. Ida
dahuluk (monismu) hatuur ezisténsia ema nian iha dimensaun ida de’it, dimensaun
klamar ka dimensaun isin (konforme liberdade hili). Perspetiva daruak
(dualismu) hateke sira rua (isin no klamar) hanesan dimensaun rua ne’ebé
ketak-ketak no fahe malu. Ponto de vista dahuluk, ita bele haree hosi parte
primeiru nian (monismu), espesífikamente “materialismu”. Materialista sira
hateten, atividade saida de’it ema nian ne’e hanesan de’it revelasaun hosi
matéria ne’e rasik. To’o dehan, atividade hotu ne’ebé “klamar” hala’o ne’e nia
hun mai hosi matéria. Perspetiva ida ne’e ita bele dehan iha nia “frakeza” no
kontraditóriu ho esénsia ema nian ne’ebé Platão rasik ko’alia (Sihotang,K.
2009, p. 55.). Ita fila ba Platão nia hanoin, loos duni katak isin no klamar
ne’e diferente, hanesan nia dehan, isin ne’e nia karater “provizóriu” no klamar
ne’e “permanente”.
To’o iha ne’e,
perspetiva ba teoria ida ne’e, hakerek-na’in sei hatutan klean liu iha
dezenvolvimentu nian. Ne’eduni ita husik teoria ne’e ita hakat ba teoria seluk
ne’ebé hateke ema
hanesan ser ne’ebé iha relasaun ba malu.
Ema la’os de’it
hanesan ser ida-ne’ebé ho nia personalidade úniku no autonómu, mas nia mós
hanesan “ser sosiál” ida. Ezisténsia ema
nian ida ne’e “ko-ezisténsia” katak ema ho ema relasaun ba malu ka relasaun ser
umanu ida ho ida seluk ou iha lian indonézia bolu ada-bersama. Relasaun sosiál ida ne’e hanaran ezistensiál, tanba
hola parte iha ser umanu ka ema. Ha’u sai ha’u tan iha relasaun ho ó (Snijders,
2004, p. 35.). Relasaun sosiál ida ne’e
hamosu problema ida ne’ebé paradoksál. Hanesan iha pergunta balun ne’ebé dehan,
oinsá ita bele hadame no hakait ema nu’udar ser sosiál no ema nu’udar privadu
ida ne’ebé autónomu? Ema sai hanesan
ser sosiál tanba iha relasaun ho ema seluk, no hanesan person, ema hamri’ik mesak. Hosi ne’e hamosu lialoos rua ne’ebé
kontraditóriu, maibé sai loos hamutuk ida de’it. Individualismu fó liu importánsia
ba autónomu ema nian nu’udar privadu ida, ne’ebé dehan relasaun sosiál ne’e sai
obstákulu ba autónomu ema nian. Sorin seluk dertermenismu sosiál konsidera ka dehan ambiente sosiál sai fatór
importante ida ba atividade ema nian. Autonómu no liberdade ba sira hanesan
iluzaun de’it, maibé tuir loloos natureza ema nian ne’e habelit-an iha lialoos
rua ne’ebé kontraditóriu ne’e. Uniaun entre lialoos rua ne’e realmente ita bele
hetan iha “domin/amór”. Liuhosi uniaun domin entre situasaun paradoksál ne’e, lori
sira rua (sosiál no autónomu) to’o iha identidade no úniku hanesan privadu idaidak
nian. Só domin de’it maka bele empatia ba situasaun paradoksál ne’e. Relasaun
sosiál kobre buat barak. Ezemplu konkretu mak ekonomia rai laran sei la mudansa
ho de’it importa no exporta sasan hodi hetan reseitas nasionál. Mas ekonomia
nasaun nian dezenvolvidu bainhira nia fó benefísiu ba nia sosiedade ka
simplesmente “ema seluk”.
Ema hanesan ser
sosiál ne’ebé bele halo relasaun sosiál ho ema seluk no nia ambiente. Ambiente
sosiál sai fatór importante ba derterminasaun personalidade ema nian. Ema
presiza klima ida-ne’ebé bele forma nia, maibé klima ema nian no la’ós klima
biolojia, klima ema nian ne’e maka “domin” ka “hadomi”.
Ema hetan nia an-rasik hosi ema seluk no deskobre nia
an-rasik ba ema seluk (Snijders, 2004, p. 38.
). Ema hakarak ema seluk simu nia, respeita nia, no seluk tan. Konseitu
sira seluk hanesan ajuda, halimar, tur hamutuk atu hatudu mai ita katak sei iha
liafuan seluk ne’ebé implisitamente subar iha konseitu hirak ne’e nia kotuk,
mak “ema seluk”. Sintéze simples katak ema seluk importante ba ita nia moris,
sé laihá ema seluk maka “ita” la ezisti.
Ne’e mak teoria
balun kona-ba ema, iha mós hanoin balun hosi Filózofu sira seluk nian kona-ba
tema ida ne’e, maibé iha espasu ida ne’e ha’u sei la hatuur ka haktuir.
III. Dezenvolvimentu
Iha espasu ne’e
ha’u sei la haktuir biografia no obra sira Autór nian, maibé sei haktuir no rezolve
de’it kestaun balun ne’ebé haktuir ona iha formulasaun ba problema.
Platão, Filózofu
ida-ne’ebé iha nia pensamentu barak tebes. Pensamentu hirak ne’e haktuir liuhosi nia obra sira ne’ebé nia
rasik hakerek, no balun hosi nia disíplu ka alunu sira. Maibé iha ne’e
hakerek-na’in sei deskreve de’it Autór nia pensamentu hahún ka bazeia ba tópiku
ka tema ne’e hakerek-na’in hili.
Iha Antropolojia
Filozófika, rekoñese Autór ne’e nia hanoin kona-ba “ema”, maske nia rasik la
hakerek nia livru kona-ba ema, maibé nia mós define sé mak ema ne’e rasik iha
pájina balun hosi nia livru fedon.
Susar tebes atu hetan livru ida ne’e nia versaun sira, maibé hirak ne’ebé
hakutir iha ne’e, halibur de’it hosi saida mak hakerek-na’in hetan iha livru
sira antropolojia filozófika nian, hodi hakerek iha ne’e.
Platão Filózofu
klásika ida-ne’ebé ko’alia no fó importánsia ba ema. Tuir nia, hanesan haktuir
ona iha parte introdusaun no revizaun bibligráfika nian kona-ba ema, nia dehan
ema ne’e ho nia forma “dualismo”, katak isin no klamar ketak-ketak, isin iha
mundu sensivel no klamar iha mundu intelijivel. Termu ida ne’e nia kontrovérsia
mak monismu ne’ebé dehan, isin no klamar ne’e ida de’it ne’ebé forma-an nu’udar
unidade substâncial ida.
Definisaun kona-ba
ema lasees hosi nia pensamentu kona-ba mundo
das Ideias. Iha nia introdusaun ba koñesimentu inteletivu no sensitivu nia
reflete liu ba natureza ema nian, isin no klamar. Tuir nia, “ema” la’ós ona
unidade substansiál, maibé asidentál. Isin no klamar ne’e ketak-ketak ne’ebé
hasoru malu provizóriu de’it durante ema nia vida sei prezente. No “ema loloos”
ne’e maka “klamar” ne’ebé ezisti iha “mundo das ideias”. Isin ne’e, hanesan
prizaun ba klamar. Klamar ne’ebé Platão
temi ne’e nia fahe ba tolu, hanesan nia hateten:
“o homem não somente uma alma, mas três: a alma racional,
a alma irascível, e a alma consupiscível. Elas se encontram, respectivamente,
na cabeça, no peito e no ventre.” (Mondin,B. 1982, vol.1, p. 72.).
Hosi klamar ne’ebé nia haktuir, sira idaidak okupa nia funsaun ne’ebé
diferente. Nia mós halo komparasaun ka analojia ba funsaun klamar nian hanesan;
“Alma rasionál” ne’e konsidera
hanesan “kuda-na’in”, no hanesan kuda
rua ne’ebé kuda-na’in baku uza choque, no habali hosi kuda-na’in. Ida seluk (alma irascível) ne’ebé konsidera
hanesan kuda ne’ebé di’ak, no ida seluk konsidera hanesan kuda ne’ebé siak no aat
(alma concupiscível). Hosi hirak
ne’e, nia atu hateten saida mai ita? Nia mós dehan, kuda ne’ebé di’ak nia
obedese ka halo tuir kuda-na’in, maibé kuda ne’ebé ladi’ak ka aat nia halo
problema oioin no fó serbisu barak ba kuda-na’in. Hodi klarifika kestaun ida
ne’e, platão halo analojia ba klamar tolu ne’ebé nia haktuir iha livru (Fedro,34) ne’ebé (Mondin, B. 1982) hakerek, dehan
nune’e:
“o cavalo bom tem o corpo direito e flexivél, cabeça
alta, nariz curvo, pelo branco, olhos negros; ama a honra, o pudor, a
temperança, e a opiniào verdadeira; não é necessário incitá-lo, porque ele é
docil às ordens a razão. O outro é encurvado e pouco desenvolvido, tem o
pescoço torto, o nariz chato, o pelo escuro...., é atrevido, lascivo e surdo e
dificilmente cede aos castigos”. (Mondin,B. 1982, Vol.1, p. 72-73).
Tuir nia, klamar ne’e simples, ita labele haree, espirituál, iha inísiu nia
hamutuk ho Ideias, no nia felisidade konsiste no kontempla iha Ideias. Maibé
iha tempu ne’ebé loloos, klamar la konsege mantein esforsu ne’ebé nesesáriu
kona-ba kontemplasaun, no nia lakon no la konsege haree hetan Ideias. Ho eventu
nakukun ne’e nia monu mai rai. (Haktuir Platão). Maske nia (klamar) monu mai
rai ka naksobu, maibé nia la lakon nia “imortalidade”,
no Platão rasik serteza kona-ba ida ne’e. Nia komprova ida ne’e liuhosi
dedika nia kapitulu barak hosi nia livru Fedon
ba tema ida ne’e.
Iha nia Livru Fedon, Platão prova
“klamar ne’ebé la mate” (imortalidade da
alma) liuhosi kapasidade ne’ebé klamar iha hodi “muda nia an-rasik”.
Argumentu ne’e hateten nune’e; “o que se
move por si mesmo é princípio de movimento e nào pode parecer nem ter origem.(
Mondin, B. 1982, Vol.1, p. 74-75.)
3.1. “Ema” nia “Essência” no “Substância”.
Tuir Filózofu
Aristóteles, esénsia ema nian ne’e hola parte iha isin no klamar ne’ebé nia
konsidera hanesan “unidade substâncial”.
Klamar hanesan “forma/suma” no isin hanesan “materia/psyche”. Tuir António José
Brito nia pensamentu ne’ebé
(Jerónimo,2017) deskreve iha nia monografia hateten “Essência Do Homem sendo “universal, infinita, ilimitada, ao
contemplar-se crê existir um ente universal, infinito e ilimitado face a ele,
que é Deus”. Sorin seluk Descartes, Platão, S. Tomas Aquinas sira hotu
define katak esénsia ema nian mak “klamar” ne’ebé la mate (maske balun dehan
klamar ne’e hamutuk, ketak-ketak no ida de’it ne’ebé ezerse funsaun la hanesan
nst). Maske definisaun hosi Filózofu hirak ne’e diferente iha introdusaun sira,
maibé sira hotu rekoñese nune’e hasa’i konkluzaun hanesan haktuir.
Platão ne’ebé
dehan, klamar ho isin ketak-ketak, no isin sai hanesan prizaun ba klamar. Ita
bele konfere hanoin ida ne’e ho doutrina relijiozu sira ne’ebé hanorin ita
dehan, se ita la fó han di’ak ba ita nia klamar mak klamar sei terus iha loron
ikus ka ba (infernu), no hanoin ida ne’e apar loos ho saida mak Platão hanorin.
Descartes ne’ebé dehan k, orientasaun ka ida-ne’ebé halo book “hanoin” ne’e
maka klamar, nune’e mós ba Aristóteles. Nune’e sintéze simples katak “esénsia
ema nian mak klamar ida-ne’ebé ita labele hetan, universál, infinita, ilimitada
no imortalidade”.
Parte seluk
Substánsia ema nian fahe ba parte rua: Substánsia materiál mak isin no
subtánsia imateriál mak klamar. Hanesan Descartes dehan “ha’u mak klamar”,
signifika katak isin nia vida maka klamar, se klamar laihá maka isin mate.
Sorin seluk, hanoin balun ne’ebé dehan substánsia ema nian ne’e fahe ba tolu;
klamar, espíritu no isin.
Ita hateke hosi lidun
seluk, ema hanesan ser ida-ne’ebé mosu iha mundu no duni ninia mundu ida-ne’ebé
aas liu. “Ema” to’o iha ne’ebé de’it nia nafatin sai hanesan animál mundu nian
ne’ebé problemátiku, signifika katak to’o ne’ebé de’it nia (ema) nafatin
ko’alia kona-ba nia an-rasik. Hanesan haktuir hosi Antigone ne’ebé dehan; “buat
barak mak di’ak no previléjiu iha mundu ne’e, maibé laihá ida maka previléjiu
liu “ema” (Cf. Bagus Lorens, Kamus Filsafat,2005, p. 566.).
Iha Filozofia
kontemporánea konsidera konseitu “esénsia”, ema la’ós hatuur ba ema, no filózofu
komtemporáneo sira dehan “ema laihá nia esénsia”.
“Na filosofia contemporânea, a essência não define nem
revela a natureza do homem.Porque o homem, ao vir a ser. não possui essência,
apenas unia condição, urna situação: "a essência do ser-aí (Dasein)
consiste apenas em sua existência" (Heidegger); é o homem mesmo quem
produz aquilo que ele é, por sua liberdade: ele é projeto, isto é, aquilo que
ele é capaz de fazer de si mesmo; nele, "a existência precede a
essência" (Sartre)”.(Dicionário Básico
de Filosofia, 2001,p. SP.)
Nune’e, ezsiténsialista sira dehan esénsia ser ida ne’e (ema) nian konsiste iha nia ezisténsia, no ema
rasik mak produs saida mak nia iha, signifika katak laiha natureza ida-ne’ebé bele movimenta nia atividade sira.
Definisaun no opiniaun lubun hosi Filózofu sira relasiona ho esénsia ema
nian, halo ema rasik nakonu ho problema no variedades iha definisaun nune’e
hakerek-na’in konklui katak ema hanesan ser ida ne’ebé riku tebes iha
definisaun.
3.2. Reflesaun krítiku Autór nia pensamentu
Intensaun hosi
hakerek-na’in hatuur sub-tópiku ne’e iha espasu ida ne’e, hakarak halo de’it
reflesaun ba teoria hotu Autór nian, nia relevánsia ho fenómenu hirak iha
sosiedade nia leet. Ita hateke iha sosiedade ida-ne’e nian, dalaruma difisil
uito’an hodi ita bele hasa’i sintéze ida kona-ba definisaun ba natureza no
globalidade ema nian. Maske nune’e, sosiedade Timorense labele hanoin no nega
atu la komprende kona-ba kontextu ema nian, liu-liu ema nia problema
orijinalidade, esénsia no nia totalidade. Ita hateke hosi baze istórika (hosi
lidun ezistensialimsu nian) iha tinan rihun resin ba kotuk iha Timor-Leste,
la’o ho sistema Liurai ne’ebé sempre mosu atan hodi serbí ba Liurai (la hamosu seres em relação), katak ema nunka
preokupa ho nia maluk seluk. Iha ohin loron lakon ona sistema ida ne’e, no ema
hotu hatene respeita malu, tulun malu, hadomi malu, tuir valores no normas
tomak mak sosiedade kria.
Ita hateke hosi
lidun Siénsia no Filozofia nian, ita tenki onestu katak laihá no nem ema ida
maka halo ona estudu kona-ba problema globalidade ema nian. Mas ita só bele
hatene definisaun tuir perspetiva relijiaun nian ne’ebé dehan “ema ne’e hanesan
kriatura Maromak nian ida-ne’ebé úniku no previléjiu liu kriatura sira seluk”.
Analizá krítiku seluk ita bele foti hosi saida mak haktuir iha revizaun
bibliográfika nian kona-ba karater ema nian hanesan; “homo socialis”, “homo
cultural”, “homo faber” no konseitu filozófiku sira seluk. Prátika ba
konseitu hirak ne’e, ezistensialmente lao hela iha sosiedade Timorense, maske
sosiedade barak la konxienti. Konseitu hirak ne’e belit metin iha sosiedade
Timorense nia isin, hahú kedas hosi Timor ne’e hahú forma-an.
Homo Socialis ne’ebé hafahe dimensaun karater ema nian ba parte rua; Dimensaun sosiál no
polítika. Sosiedade Timorense sempre tulun malu banhira haree nia maluk seluk
hetan moras ka problema ruma (atividade sosiál), nune’e mós moris hamutuk iha
fatin ka grupu ida-ne’ebé mai ho variedades kultura, relijiaun, etnias no sira
seluk, mas nafatin simu malu sem halo diskrimisaun. Ezemplu seluk maka,
sosiedade Timorense moris ho maioria populasaun relijiaun katótika, por volta
de 96 %, mas nafatin hatudu toleránsia ba malu no la mosu diskriminasaun iha
sira nia leet, ne’e signifika katak sosiedade Timor hatudu sira nia karater
polítiku ne’ebé loloos tuir esénsia humana nian (dimensaun polítika). Dimensaun
polítika seluk maka ita bele hetan iha Organizasaun sosiál komunidade sira (
ezemplu iha Ataúro), bazeia ba relasaun hosi belun ba belun, lori halo troka ka
sirkulasaun sasán liuhosi família sira, ne’e fatór determinante mak bele halo
membru sira atu envolve-an iha kualker atividade. Sei iha tan grupu sira balun,
hanesan purezemplu, Lideransa tradisionál sira, xefe suku no xefe aldeia sira,
lideransa sira igreja nian, juventude, profesór sira, no seluseluk
tan.(Boarccaech ,Alessandro, p.3).
Komunidade Atauro,
hatudu ona “relasaun sosiál” ema nian, sira halo buat hotu hanesan haktemik.
Sira mós halo ka troka malu sasan ka halo sirkulasaun sasan ba malu, sia hatudu
karater ema nian hanesan (homem económico).
Karater ema nian ida seluk maka “homo
cultural”, ita ko’alia ba ema Timoroan ha’u hanoin ita la’ós halo verdade
ba Timoroan sira, maibé ita tenki onestu no husik realidade revela rasik mai
ita. Ita Timor moris ho variedades kultura, komunidade timorense barak maka iha
“kreatividade” hodi “transforma sira nia pensamentu” sai ba realidade ida. Ezemplu halo tais, babadok, belak etc, no
hirak ne’e hotu presiza liuhosi esforsu no serbisu. Se ita ko’alia kona-ba
serbisu maka, la sees hosi karater ema nian ida hanesan “homo faber”.
Maske ita hatene
katak sosiedade Timoroan barak hala’o no hatudu ona sira nia karater nu’udar
“ser sosiál”, “ser cultural”, “ser produtivo” maibé iha balun ne’ebé sei
nafatin hamate esénsia no natureza ema nian hanesan temi iha leten, signifika
katak balun seidauk konxienti ho loloos kona-ba sira nia karater umanu. Balun
sei oho malu, laran moras ba malu, lakoi simu diverjénsia, no balun sei nafatin
iha atan iha uma. Hirak ne’e la’ós akontese bebeik maibé dala balun.
IV. Konkluzaun
Haree ba
definisaun hotu iha leten, iha definisaun barak mak kontrovérsia, paradoksál no
multi-dimensionál, maski nune’e hakerek-na’in rasik iha konkluzaun ida katak
ema ne’e hanesan ser rasionál ne’ebé kompostu hosi isin no klamar, isin hanesan
ser materiál no klamar hanesan ser espirituál ne’ebé bele movimenta kualker
atividade ema nian, ne’ebé karateriza iha karater ema nian.
V.
Remata
Ha’u hanoin ne’e
mak ideia simples balun ne’ebé ha’u konsege foti sai hosi ha’u nia monografia
finál kursu nian. Ha’u la konsege foti no haktuir hotu ideia sira hotu iha
espasu ida ne’e. Iha espasu ne’e ha’u la hatuur nia metodolojia peskiza no mós
la tuir nia formatu orijinál. Ne’eduni hodi hakotu, hakarek-na’in iha esperansa
hodi loke espasu ba diskusaun relasiona ho tema ida ne’e.
Ideia sira hotu
mak haktuir iha espasu ne’e halo ona defeza perante ekipa ezaminadór no
orientadór iha loron 03 fulan Marsu tinan 2018, iha Kampus Sentrál Universidade
Nasional Timor Lorosa’e, sala de aula Faculdade de Filosofia e Ciências Humanas
nian.
Referénsia
Bibliográfika
Abidin, Zainal. Filsafat Manusia:
Memahami Manusia melalui Filsafat, Rosda Karya, Yogyakarta, 2000.
Bagus, Lorens., Kamus Filsafat, Jakarta: Gramedia,
2005.
Boarccaech ,Alessandro. Comunicasaun oral iha
Congresu Arte no Industria Kriativa iha Timor, julho de 2011.
Hartmann, P. Feuerbach Eo Ateísmo
Antropológico, Porto Alegre, 2012.
Japiassú Hilton & Marcondes Danilo. Dicionário Básico De
Filosofia: Terceira edição revista e ampliada, Jorge Zahar Editor, Rio de
Janeiro 2001.
Jerónimo. Monografia Final: o Homem e a Verdade,
Segundo Edvino Aloisio Rabuske, FFCH-UNTL, 2017.
Kamaluddin, Ahmad
Undang. Filsafat
Manusia; Sebuah Perbandingan antara Islam dan Barat, Bandung: CV Pustaka
Setia, 2012.
Maksum, Ali. Pengantar Filsafat;
Dari Masa Klasik Hingga Postmodernisme Yogyakarta: Ar-Ruzz Media,
2009.
Mondin, Battista. O Homem, Quem É Ele?
Elementos Da Antropologia Filosófica, Paulus, 1980.
Mondin, Battista. Curso De Filosofia; Vol.
1, Paulus, 1982.
Mondin, Battista. Curso De Filosofia; Vol.
2, Paulus, 1982.
Pegaroro, Olinto. O que é o Ser
Humano?, SL, 1999.
Platão, Fédon
(a imortalidade da alma), Versão Eletrónica; Tradução Carlos Alberto
Nunes.
Rhaman, Arif Masykur. Buku Pintar Sejarah
Filsafat Yogyakarta, 2013.
Sihotang, Kasdin. Filsafat Manusia,
Upaya membangkitkan Humanisme, Kanisius, 2009.
Snijerds, Adelbert. Antropologi Filsafat;
Manusia Paradoks Dan Seruan: Kanisius, 2004.
Sofyan, Ayi. Kapita Selekta
Filsafat Cet. I, Bandung: Pustaka Setia, 2010.
