ANÁLIZA FILOZÓFIKA KONSEITU “PAZ” IHA KONTEXTU TIMOR-LESTE
Hakerek -na’in: Erri Ferreira- Finalista FFCH-UNTL
Paz, konseitu ida
ne’ebé brillante no furak tebes bainhira ita ko’alia iha kontextu Nasaun sira
pos-konflitu nian. Signifika ba nasaun sira hanesan Timor-Leste seidauk tarde
ita koa’lia konseitu ida ne’e. Istórikamente Timor-Leste hakat liu istória
nakukun nian durante tinan-450 hosi ukun kolonialismu Portugál no tinan-24 hosi
Okupasaun Ilegál Indonézia. Iha momentu ne’eba ho verdade no onestu ita
esplisitamente dehan Timor-Leste la moris iha kondisaun ka situasaun Paz nia
laran.
Ohin, Timor-Leste
hamri’ik ho independénsia totál nu’udar Nasaun Soberanu ida-ne’ebé iha nia
Konstituisaun rasik no hakru’uk ba lei internasionál sira durante tinan-16 nia
laran ona. Maske nu’udar País Joven liu iha universu ida ne’e, Nasaun ida ne’e
kontribui ona Paz lubuk ida hamutuk ho nasaun Frajíl sira seluk liuhosi
organizasaun G7+, ho objetivu prinsipál mak
lori no ajuda nasaun sira hotu moris iha situasaun dame no hakmatek nia
laran.
Maske
internasionalmente Timor-Leste kontribui ajudus lubun ida ne’ebé kontribui ba
paz iha nasaun sira seluk iha mundu ida
ne’e, la signifika sosiedade, liu-liu povu Timor-Leste entende ho loloos
konseitu paz no nia implementasaun sira. Tenki onestu hodi dehan, sosiedade
Timor-Leste maioria mak sei hamosu hela pre-konseitu ba konseitu ida ne’e.
Koñesimentu sensu
komum nian kona-ba paz ne’ebé durante ne’e ita rona mak, ema wa’in defini
konseitu Paz hanesan“kondisaun ou situasaun ida-ne’ebé hakmatek (laiha problema
ou konflitu), laiha funu no ema hotu simu malu hodi moris hamutuk no hakmatek
iha dame no domin nia laran. Ita hateke ba definisaun ida ne’e, ita koko halo
reflesaun krítiku no refletivu hosi lidun realidade ezistensiál nian kona-ba
situasaun ida ne’e. Se ita halo verdade ba definisaun koñesimentu sensu komum
nian ne’e mak, ita ho fiar-an hasa’i sintéze ida katak loos duni Timor-Leste
país ida-ne’ebé moris iha dame no hakmatek nia laran, tan nia sosiedade hotu
moris hakmatek laiha problema ou konflitu no ema hotu simu malu nu’udar seres em relação. Maibé karik ita lakoi
simu de’it definisaun ida ne’e no koko hasees-an hosi definisaun ida ne’e mak
mosu pergunta sira hanesan; Tebes no loos duni ka paz mak ita ko’alia ba nasaun
ou ema ida moris hakmatek, laiha konflitu, no laiha funu? Se ita koko hamosu
pergunta sira hanesan ne’e mak, definisaun iha leten ita ho fiar-an dehan
definisaun ne’e “inserteza definisaun”, katak definisaun ne’e seida’uk serteza
ka loos liu.
Pesoalmente,
atraves ha’u nia perspetiva individuál defini paz hanesan “situasaun ou
kondisaun sosiál, polítika, ekonómika ema no nasaun ou estadu ida nian di’ak
loos ona, no laiha problema ou konflitu ka krize sosiál, polítika, ekonómika no
konflitu fíziku ka psikolójiku iha ema ida-idak nia an, família, sosiedade no
nasaun, ka simplesmente ema hotu moris iha justisa sosiál iha Nasaun ka Estadu
ida.
Hahún ba
definisaun ida ne’e, ita halo análiza krítiku ba realidade Timor-Leste nian,
liu-liu ba ema ida-idak nia an, ita ho pesimista dehan, ezisténsia hosi
konseitu ida ne’e uito’an liu ezisti iha sosiedade nia leet. Ezemplu konkretu
maka ema barak sei hirus malu no oho malu, tara-an (oho-an), stres, no problema
Fíziku no pskolójiku seluk ne’ebé ita idaidak obeserva. Injustisa sosiál sei
buras iha fatin barak. Ukun-Na’in sira aproveita oportunidade sira hodi halo
korupsaun, opresaun no traisaun ba konfiansa povu nian ne’ebé fó ba sira.
Kompañia balun seiduak fó kompensa ho loloos tuir rezultadu serbisu traballadór
sira nian. Violasaun seksuál mosu iha fatin barak, tráfiku umanu, abuzu
seksuál, violénsia doméstika no problema sosiál seluk. Konsekuensia boot hosi
problema no injustisa sosiál hirak ne’e lori ema hotu ba problema no to’o
konflitu, se to’o ona konflitu mak paz nafatin la eziste. Tanba ne’e antes
hakotu, hakarak hasa’i de’it sintéze ida katak “paz só ezisti bainhira laiha
ona problema no injustisa sosiál iha sosiedade nia leet”.
